काठमाडौं: रुसले हालै इस्टर अवसरमा घोषणा गरेको ३० घण्टे युद्धविराम सकिएको छ। उक्त घोषणा अमेरिकी राष्ट्रपति डोनाल्ड ट्रम्पको दबाबपछि गरिएको हो।
यो युद्धविराम त्यतिबेला गरिएको थियो जब ट्रम्पले चेतावनी दिएका थिए — यदि रुस र युक्रेन चाँडै शान्ति सम्झौतामा पुग्न असफल भए, भने उनी शान्ति स्थापनाका लागि गरिरहेको प्रयास त्याग्नेछन्।
शुक्रबार ट्रम्पले भनेका थिए, “यदि दुबै पक्षले शान्ति सम्झौतामा पुग्न अत्यधिक जटिलता सिर्जना गरे भने हामी शान्ति पहलबाट पछि हट्नेछौं।”
समाचार एजेन्सी रोयटर्सका अनुसार, अमेरिकी विदेश मन्त्रालयले आइतबारपछि पनि युद्धविराम कायम रहोस् भन्ने चाहना राखेको थियो, तर त्यो सम्भव भएन।
युद्धविराम अवधिमा रुस र युक्रेन दुवैले एकअर्कामाथि उल्लंघनको आरोप लगाएका छन्।
यद्यपि, ट्रम्पले स्वयं युद्धविरामबारे प्रत्यक्ष टिप्पणी गरेका छैनन्। तर आफ्ना सामाजिक सञ्जाल पोस्टहरूमा उनले आशा व्यक्त गरेका छन् कि रुस र युक्रेन यसै हप्ता कुनै सम्झौतामा पुग्न सक्छन्, जसले दुवै देशलाई अमेरिकासँग राम्रो व्यापार गर्न सहयोग पुर्याउनेछ।
अमेरिकी राष्ट्रपति ट्रम्पले अघिल्लो पटक घोषणा गरेका थिए कि राष्ट्रपति बनेको २४ घण्टाभित्रै युक्रेन युद्ध अन्त्य गराउनेछन्। त्यसयता उनले दुबै पक्षलाई शान्ति सम्झौता गर्न असफल भएकोमा दोष दिँदै आएका छन्।
बीबीसीका पत्रकार स्टिभ रोजेनबर्गका अनुसार, रुस अहिले आफूले शान्ति चाहेको सन्देश दिन चाहन्छ — यद्यपि व्यवहारमा स्थिति फरक छ।
