काठमाडौं: गैरकानुनी रूपमा थुनामा राखिएको भन्दै रवि लामिछानेकी पत्नी निकिता पौडेलद्वारा दायर गरिएको बन्दीप्रत्यक्षीकरणको रिटमा आज सुनुवाइ हुने भएको छ।
सुनुवाइका लागि रिट सर्वोच्च अदालतका प्रधानन्यायाधीश प्रकाशमान सिंह राउत र न्यायाधीश नित्यानन्द पाण्डेयको संयुक्त इजलासमा तोकिएको हो।
यसअघि रिट पटक–पटक ‘हेर्न नमिल्ने’मा परेर सुनुवाइ स्थगित हुँदै आएको थियो। अहिलेसम्म ६ पटक पेशी चढ्दा ५ पटक ‘हेर्न नमिल्ने’मा परेको र एकपटक मात्र सुनुवाइ भएको थियो।
रास्वपा सभापति लामिछाने सहकारी ठगी प्रकरणमा जिल्ला कारागार कार्यालय, रुपन्देहीमा थुनामा छन्। जिल्ला अदालत, रुपन्देहीले उनलाई एक करोड रुपैयाँ धरौटीमा रिहा गर्ने आदेश दिएको थियो। तर, उच्च अदालतले सो आदेश उल्ट्याउँदै थुनामा पठाएको हो।
रिट निवेदक निकिता पौडेलले काठमाडौंबाट नियन्त्रणमा लिँदै गर्दा कानुनी प्रक्रिया पूरा नगरिएको दाबी गरेकी छन्।
