काठमाडौं: पोप फ्रान्सिसको निधनपछि नयाँ पोप चयन प्रक्रिया यही मे ७ मा सुरु हुने भएको छ। विश्वव्यापी रोमन क्याथोलिक चर्चका सर्वोच्च नेता पोपको चयनका लागि १३५ कार्डिनलहरू भ्याटिकनमा भेला हुनेछन्।
यो निर्वाचन संसारकै सबैभन्दा पुरानो र गोप्य प्रक्रिया मानिन्छ। निर्णय सिस्टिन चैपलमा हुने एक गोप्य सम्मेलनमार्फत लिइन्छ, जसमा ८० वर्ष मुनिका कार्डिनलहरूले मात्र मतदान गर्न पाउँछन्।
पोप फ्रान्सिसको गत अप्रिल २१ मा ८८ वर्षको उमेरमा निधन भएको थियो। उनको अन्त्येष्टि शनिबार सम्पन्न भयो। अब मे ७ बाट सुरु हुने निर्वाचनमा सहभागी कार्डिनलहरू मध्ये धेरैजसो फ्रान्सिसद्वारा नियुक्त भए पनि उनीहरू एक-अर्कालाई राम्रोसँग नचिनेको भन्दै निर्वाचनमा समय लाग्न सक्ने रोयटर्सले जनाएको छ।
नियमअनुसार, ८० वर्षभन्दा माथिका कार्डिनलहरूले मतदान गर्न पाउँदैनन्, तर उनीहरू सम्मेलनमा उपस्थित हुन र बन्द सत्रमा भाग लिन सक्छन्।
सिस्टिन चैपलमा हुने पोप निर्वाचन प्रक्रिया सन् १६ औं शताब्दीबाट निरन्तर अभ्यास हुँदै आएको परम्परा हो। सन् २००५ र २०१३ मा आयोजित अघिल्ला निर्वाचनहरू दुई दिनमै टुंगिएको भए पनि यसपटक छलफल लामो हुन सक्ने अनुमान गरिएको छ।
