काठमाडौं: जापानी सरकारका मन्त्री रोसाई अकाजावा मंगलबार अमेरिकी भन्सार कर घटाउन पहल गर्न वाशिंगटन पुगेका छन्।
जापानका प्रमुख क्याबिनेट सचिव योशिमासा हयाशीले पत्रकारहरूसँग कुरा गर्दै भने, “हामी अमेरिकी पक्षसँग पुनः भन्सार करको पुनरावलोकन गर्न अपील गर्नेछौं। यस विषयमा यथासक्य चाँडो निष्कर्षमा पुग्न हामी प्रतिबद्ध छौं।”
गत हप्ता जापानी प्रधानमन्त्री शिगेरु इशिबा र अमेरिकी राष्ट्रपति डोनाल्ड ट्रम्पबीच भन्सार सम्बन्धी विषयमा छलफल भएको थियो। यद्यपि प्रधानमन्त्री इशिबाले जापानले कुनै पनि सम्झौता गर्न हतार नगर्ने स्पष्ट पारेका थिए।
जापान अमेरिका निकट सहयोगी राष्ट्र हो। हाल अमेरिका जापानी निर्यातमा २४ प्रतिशत ‘पारस्परिक’ कर लगाउँदै आएको छ, जसमा हाललाई ९० दिनको अस्थायी राहत दिइएको छ।
तर टोयोटा, होन्डा र निसानजस्ता जापानी अटोमोबाइल कम्पनीहरूले अमेरिकामा सवारी साधन निर्यात गर्दा अझै पनि २५ प्रतिशत भन्सार शुल्कको सामना गरिरहेका छन्। यसले दुई देशबीचको व्यापार सम्बन्धमा दबाब सिर्जना गरेको छ।
