काठमाडौं । संघीय संसद्अन्तर्गत प्रतिनिधिसभाको बैठक आज बिहान ११ बजे बस्दैछ। संघीय संसद् सचिवालयका अनुसार बैठकमा अर्थसम्बन्धी विधेयकसहित विभिन्न विषयमा छलफल हुने कार्यसूची रहेको छ।
आजको बैठकमा अर्थमन्त्री डा. स्वर्णिम वाग्लेले ‘अर्थसम्बन्धी केही नेपाल कानुनलाई संशोधन र खारेज गर्ने विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नेछन्।
त्यसैगरी, सभामुख डोलप्रसाद अर्यालले प्रतिनिधिसभाका पूर्वसदस्य तथा संविधानसभा सदस्य गोपालमान श्रेष्ठ को निधनप्रति शोक प्रस्ताव पेस गर्ने कार्यसूची रहेको छ।
यसैबीच, विधायन व्यवस्थापन समिति को बैठक पनि आज बिहान ११ बजे बस्ने भएको छ। बैठकमा ‘संघीयतामा विधायिकी अन्तरसम्बन्धः नेपालमा अभ्यास, आवश्यकता र चुनौती’ विषयमा अभिमुखीकरण कार्यक्रम सञ्चालन हुने संघीय संसद् सचिवालयले जनाएको छ।
