काठमाडौं । थोर्बजोर्न जगल्याण्ड लाई गत साता आत्महत्या प्रयास गरेको आरोपपछि अस्पताल भर्ना गरिएको विभिन्न मिडिया रिपोर्टहरूले जनाएका छन्। केही सञ्चारमाध्यमका अनुसार उनको अवस्थाबारे सार्वजनिक नगर्ने विषयमा नर्वेजियन सम्पादक संघ र उनका वकिलबीच समझदारी भएको दाबी गरिएको छ, यद्यपि आधिकारिक पुष्टि भने भएको छैन।
जगल्याण्डमाथि गम्भीर भ्रष्टाचारको आरोप लागेको छ। उनका वकिल एल्डेन ल फर्मले CNN लाई दिएको प्रतिक्रियामा भ्रष्टाचारसम्बन्धी आरोप लागेको पुष्टि गरे पनि सबै आरोप अस्वीकार गरिएको बताएका छन्।
नर्वेको आर्थिक अपराध अनुसन्धान निकाय Økokrim ले यस विषयमा अनुसन्धान गरिरहेको छ। एजेन्सी निर्देशक पौल लोन्सेथले अनुसन्धानका लागि पर्याप्त आधार रहेको बताएका छन्। अनुसन्धानका क्रममा ओस्लोस्थित उनको घरसहित अन्य दुई सम्पत्तिमा पनि खोजतलास गरिएको छ। औपचारिक रूपमा संदिग्ध घोषित गरिएका जगल्याण्डसँग अब सोधपुछ गरिने बताइएको छ।
अनुसन्धान उनको Norwegian Nobel Committee का अध्यक्ष (२००९–२०१५) र Council of Europe का महासचिव (२००९–२०१९) पदमा कार्यरत अवधिसँग सम्बन्धित रहेको जनाइएको छ। उनले आफ्नो पदको दुरुपयोग गरी उपहार, यात्रा, ऋण वा अन्य सुविधा लिएका थिए कि थिएनन् भन्ने विषयमा छानबिन केन्द्रित छ।
यो मुद्दा दोषी ठहरिएका यौन अपराधी Jeffrey Epstein सँगको उनको सम्बन्धको विषयसँग पनि जोडिएको छ। अमेरिकी न्याय विभागले जनवरी ३० मा सार्वजनिक गरेको कागजातअनुसार जगल्याण्ड र उनको परिवारले पेरिस, न्यूयोर्क र पाम बीचस्थित एपस्टाइनका सम्पत्तिमा पटक–पटक भ्रमण गरेको उल्लेख छ।
जगल्याण्डले एपस्टाइनसँगको सम्बन्धलाई “खराब निर्णय” भनेका छन् तर कुनै गैरकानुनी काम नगरेको दाबी गरेका छन्। अनुसन्धान एजेन्सीहरूले पनि हालसम्म उनलाई एपस्टाइनका यौन अपराधसँग प्रत्यक्ष रूपमा जोडिएको नदेखिएको स्पष्ट पारेका छन्। अनुसन्धान केवल उनले आफ्नो पदबाट अनुचित लाभ लिएका थिए कि थिएनन् भन्ने विषयमा केन्द्रित छ।
उचित अनुसन्धान सुनिश्चित गर्न उनका कूटनीतिक उन्मुक्ति खारेज गर्ने प्रक्रिया समेत सुरु गरिएको बताइएको छ।
