वासिङ्टन डीसी । जेपी मोर्गन चेजले राष्ट्रपति डोनाल्ड ट्रम्पद्वारा दायर गरिएको ५ अर्ब अमेरिकी डलरको मुद्दामा कडा प्रतिवाद गर्दै मुद्दा सङ्घीय अदालतमा सार्न माग गरेको छ। कम्पनीले आफ्ना प्रमुख कार्यकारी अधिकृत जेमी डिमनलाई मुद्दामा धोखापूर्वक समावेश गरिएको आरोप लगाएको छ।
बैंकका वकिलहरूले अदालतमा दायर गरेको निवेदनमा ट्रम्पको मुद्दा त्यस्तो कानुनमा आधारित रहेको उल्लेख गरेका छन्, जसले सङ्घीय रूपमा नियमन भएका बैंकका अधिकारीहरूलाई उनीहरूको आधिकारिक भूमिकामा कार्य गर्दा विशेष संरक्षण प्रदान गर्छ। उनीहरूका अनुसार फ्लोरिडाको ‘डिसेप्टिभ एन्ड अनफेयर ट्रेड प्र्याक्टिसेस एक्ट’ सङ्घीय नियमनमा रहेका बैंक अधिकारीहरूमा लागू नहुने भएकाले डिमनलाई मुद्दामा समेट्नु अनुचित छ।
गत महिना ट्रम्पले जेपी मोर्गन चेज र डिमनविरुद्ध मुद्दा दायर गर्दै सन् २०२१ मा राजनीतिक कारणले आफूलाई बैंकको ग्राहक सूचीबाट हटाइएको आरोप लगाएका थिए। सो मुद्दामा उनले ५ अर्ब डलर क्षतिपूर्ति माग गरेका छन्।
जेपी मोर्गनका अनुसार कानुनी रूपमा कम्पनी ओहायो राज्यमा दर्ता भएको छ। मुद्दाका कुनै पनि वादी ओहायोका नागरिक नभएकाले यसलाई सङ्घीय अदालतमा सुनुवाइ गर्न मिल्ने आधार रहेको बैंकको दाबी छ। बैंकले ट्रम्प पक्षका कानुन व्यवसायीहरूले मुद्दा राज्य अदालतमै राख्न डिमनलाई जानाजानी प्रतिवादी बनाएको आरोप लगाएको छ।
यस विषयमा बैंकिङ समूहले थप सार्वजनिक टिप्पणी गर्न अस्वीकार गरेको छ भने ह्वाइट हाउससँग प्रतिक्रिया मागिएको जनाइएको छ।
