काठमाडौँ — जनता समाजवादी पार्टीका अध्यक्ष महन्थ ठाकुर, वरिष्ठ नेता राजेन्द्र महतो र जसपा कार्यदलका लक्ष्मणलाल कर्ण र सर्वेन्द्रनाथ शुक्ला मंगलबार प्रधानमन्त्री केपी शर्मा ओलीलाई भेट्न बालुवाटार गएका छन् ।
रेशम चौधरीको रिहाइलगायतका आफ्ना मागहरूबारे सरकारको आधिकारिक धारणा लिनका लागि नेताहरू प्रधानमन्त्री निवास बालुवाटार पुगेको जसपाका एक नेताले इकान्तिपुरलाई बताए । प्रधानमन्त्रीले पछिल्लो समय सरकार टिकाउन अनुचित सहमति नगर्ने भनेर दिएको अभिव्यक्तिबारे प्रस्ट हुन पनि जसपाका अध्यक्ष ठाकुरसहित नेताहरू बालुवाटार गएको ती नेताले बताए ।
पछिल्लो समय सत्ता समीकरणबारे जसपाभित्र पनि विवाद देखिएको छ । गत बिहीबारको केन्द्रीय कार्यकारिणी समितिको बैठकमा अध्यक्ष उपेन्द्र यादवले बिनासर्त ओलीको विकल्पमा तीन दलको गठबन्धन सरकार बनाउने प्रस्तावसहितको प्रतिवेदन बैठकमा प्रस्तुत गर्ने तयारी गरेका थिए ।
प्रतिवेदनमा कांग्रेस, माओवादी र जसपामध्ये समझदारीमा सरकारको नेतृत्व गर्ने विषय थियो । बैठकमा प्रस्तुत गर्नुअघि उक्त प्रतिवेदन पाँच सदस्यीय पदाधिकारी बैठकमै विवाद भएपछि केन्द्रीय कार्यकारिणी समितिको बैठक रोकिएको थियो । ठाकुर र महतोले यादवको प्रतिवेदन अपरिपक्व भएको बताएका थिए ।
मंगलबार बालुवाटार गएका चार जना नेता नै पूर्वराजपाका हुन् । सत्ता समीकरणबारे जसपामा तत्कालीन संघीय समाजवादी फोरम र राष्ट्रिय जनता पार्टीका रुपमा कित्ताकाट देखिएको छ ।
त्यस्तै नयाँ सत्ता समीकरणका लागि माओवादी केन्द्रले सत्ताबाट अलग भएको निर्णय गर्नुपर्ने र निर्णायक देखिएको जसपाले प्रस्ट धारणा बनाउनुपर्ने कांग्रेसले अडान राखेको छ भने पहिला कांग्रेस र माओवादी प्रस्ट हुनुपर्ने जसपाको धारणा छ ।
कान्तिपुरबाट सभार
