एजेन्सी – चीनमा ह्युमनोइड रोबोटको विकाससँगै आवश्यक मुख्य कम्पोनेन्टहरूको माग बढ्दै गएको छ। अनुसन्धान प्रयोगशालाहरूबाट कारखाना र घरसम्म मानवजस्तै रोबोटको प्रयोग बढ्दा रोबोटका भागहरूको मागमा पनि उल्लेखनीय वृद्धि भएको हो।
दक्षिण चीनको ग्वाङडोङ प्रान्तस्थित एक रोबोटिक्स कम्पनीले उत्पादन गर्ने रिड्यूसरहरू प्रायः औद्योगिक रोबोटमा प्रयोग हुने भए पनि यस वर्ष ह्युमनोइड रोबोट क्षेत्रमा माग उल्लेखनीय रूपमा बढेको जनाएको छ।
रोबोटिक्स कम्पोनेन्ट कम्पनीका महाप्रबन्धक शेन सियाओलोङका अनुसार, “यस वर्ष नयाँ अर्डरहरू दोब्बरभन्दा बढी भएका छन्। ह्युमनोइड रोबोट क्षेत्रबाट आएका अर्डरहरूले कुल अर्डरको करिब २० प्रतिशत ओगटेको छ। अर्को वर्ष हाम्रो उत्पादन क्षमता दोब्बर गर्ने योजना छ।”
चिनियाँ रोबोट निर्माताहरूका अनुसार उनीहरूको लक्ष्य रोबोटहरूलाई बलियो बनाउनु मात्र नभई स्मार्ट पनि बनाउनु हो। ह्युमनोइड रोबोटले घर, व्यवसायिक ठाउँ र औद्योगिक सेटिङमा व्यापक प्रयोगको सम्भावना देखाएका छन्।
चीनको ह्युमनोइड रोबोट उद्योगको बजार यस वर्ष करिब ३४ करोड अमेरिकी डलरको अनुमान छ र अर्को दशकमा यसले लगभग २० अर्ब अमेरिकी डलर पुग्ने अपेक्षा गरिएको छ।
