काठमाडौं । प्रतिनिधिसभा बैठक आइतबार पटक–पटक स्थगित र सञ्चालन हुँदै चार पटक बसेको छ। विपक्षी दलहरूको अवरोध र सत्तारूढ दलका सांसदहरूको प्रतिवादबीच तनावपूर्ण बनेको बैठकबाट अन्ततः दुई महत्त्वपूर्ण विधेयक पारित गरिएको छ।
प्रतिनिधिसभाले प्रतिनिधिसभा सदस्य निर्वाचन (पहिलो संशोधन) विधेयक, २०८३ र मतदाता नामावली (पहिलो संशोधन) विधेयक, २०८३ पारित गरेको हो। यसअघि प्रतिनिधिसभाबाट पारित भई राष्ट्रिय सभामा पुगेका यी विधेयक राष्ट्रिय सभाले संशोधनसहित फिर्ता पठाएको थियो। प्रतिनिधिसभाले राष्ट्रिय सभाका संशोधन स्वीकार गर्दै विधेयक पारित गरेको हो।
राति १० बजेपछि विधेयक पारित भएपछि सभामुख डोलप्रसाद अर्यालले प्रमाणित गरेका थिए। त्यसपछि संघीय संसद् सचिवालयले प्रमाणीकरणका लागि राष्ट्रपति कार्यालय पठाएको थियो। राष्ट्रपति कार्यालयले राति ११:२५ बजे राष्ट्रपतिबाट विधेयक प्रमाणीकरण भएको जानकारी सार्वजनिक गरेको थियो।
सरकारले यसलाई समयको चापसँग जोडेको छ। कानुनी व्यवस्थाअनुसार अध्यादेश संसद्को पहिलो बैठकमा पेस गर्नुपर्ने र पेस भएको ६० दिनभित्र दुवै सदनबाट पारित भई प्रमाणीकरण हुनुपर्ने प्रावधान छ। निर्धारित समयभित्र प्रक्रिया पूरा नभए कानुनी वैधता समाप्त हुने अवस्था आउने थियो।
यी दुवै विधेयकको कानुनी वैधता आइतबार राति १२ बजेसम्म मात्र कायम रहने भएकाले संसद्ले तीव्र प्रक्रियामार्फत विधेयक पारित गरेको हो।
राष्ट्रपति कार्यालयका प्रवक्ता रितेश शाक्यका अनुसार कानुनी रिक्तताको अवस्था सिर्जना हुन सक्ने जानकारीपछि राति नै प्रमाणीकरण प्रक्रिया अघि बढाइएको हो।
पूर्वसंसद् सचिव राजेन्द्र फुँयालका अनुसार अध्यादेश संसद्मा पेस भएपछि ६० दिनभित्र दुवै सदनबाट पारित, प्रमाणित र प्रमाणीकरण हुनैपर्ने कानुनी व्यवस्था भएकाले समयसीमाभित्र काम नसकिए कानुन स्वतः निष्क्रिय हुने अवस्था आउँछ।
