काठमाडौँ: विशेष अदालतले मालपोत कार्यालय, टीकापुर कैलालीका तत्कालीन प्रमुख मोहन स्नेही रसाइलीसहित आठ जनालाई भ्रष्टाचार अभियोगमा दोषी ठहर गरेको छ।
अदालतका अध्यक्ष टेकनारायण कुँवर तथा न्यायाधीशहरू मुरारीबाबु श्रेष्ठ र विदुर कोइरालाको इजलासले चार जनालाई मुख्य अभियुक्त र चार जनालाई मतियार ठहर गर्दै फैसला सुनाएको हो।
मालपोत प्रमुख रसाइलीलाई एक वर्ष, मानबहादुर चन्दलाई नौ महिना, अग्नीबहादुर शाही र दशरथ मण्डललाई जनही छ महिना कैद सजाय तोकिएको छ। मतियारहरू विन्द्रा रावल, कमलबहादुर रावल, सुनीलबहादुर रावल र विमल रावललाई पनि छ-छ महिना कैद सजाय सुनाइएको छ।
ज्येष्ठ नागरिक भएकाले विन्द्रा रावललाई ७५ प्रतिशत सजाय कटौती गरी एक महिना १५ दिन कैद मात्र हुने फैसला भएको छ। अख्तियार दुरुपयोग अनुसन्धान आयोगले आठै जनाविरुद्ध रु २४ करोड ६ लाख ६९ हजार भ्रष्टाचार गरेको अभियोगमा मुद्दा दायर गरेको थियो।
