काठमाडौं। ICC Men’s T20 World Cup अन्तर्गत आज (आइतबार) सुपर–८ चरणका दुई महत्वपूर्ण खेल हुँदैछन्।
पहिलो खेलमा श्रीलंका र इंग्ल्यान्डबीच प्रतिस्पर्धा हुनेछ। इंग्ल्यान्ड समूह ‘सी’बाट तीन जित र एक हारसहित सुपर–८ मा प्रवेश गरेको हो भने श्रीलंका समूह ‘बी’बाट समान तीन जित र एक हारका साथ अघिल्लो चरण पार गर्दै आएको छ। दुवै टोली आफ्नो–आफ्नो समूहको उपविजेता हुन्। यो खेल दिउँसो ३ बजेर १५ मिनेटमा सुरु हुनेछ।
शनिबारदेखि सुरु भएको सुपर–८ चरणको पहिलो खेल वर्षाले प्रभावित बनेको थियो। न्युजिल्यान्ड र पाकिस्तानबीचको खेल अवरुद्ध भएपछि दुवै टोलीले अंक बाँडेका थिए।
२० राष्ट्र सहभागी प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्यान्ड सुपर–८ मा पुगेका छन्। सुपर–८ अन्तर्गत समूह एकमा भारत, दक्षिण अफ्रिका, वेस्ट इन्डिज र जिम्बावे रहेका छन् भने समूह दुईमा इंग्ल्यान्ड, न्युजिल्यान्ड, पाकिस्तान र श्रीलंका छन्।
आजको दोस्रो खेलमा साविक विजेता भारत र उपविजेता दक्षिण अफ्रिकाबीच प्रतिस्पर्धा हुनेछ। भारतमै आयोजना हुने यो खेल साँझ ७ बजेर १५ मिनेटमा सुरु हुनेछ। भारत समूह ‘ए’को विजेता हो भने दक्षिण अफ्रिका समूह ‘डी’को विजेता हो। समूह चरणमा दुवै टोली अपराजित रहँदै सुपर–८ मा पुगेका हुन्।
सुपर–८ का खेलहरूले सेमिफाइनल यात्राका लागि महत्वपूर्ण दिशा निर्धारण गर्ने अपेक्षा गरिएको छ।
