काठमाडौँ । अमेरिकी सर्वोच्च अदालतले अमेरिकामा जन्मेका केही बालबालिकालाई नागरिकताको संवैधानिक अधिकार छ कि छैन भन्ने मुद्दामा सुनुवाइ गर्न सहमति दिएको छ।
यो मुद्दा अमेरिकी राष्ट्रपति डोनाल्ड ट्रम्प ले यस वर्ष जनवरीमा पदभार ग्रहण गरेपछि जारी गरेको आदेशसँग सम्बन्धित छ। उक्त आदेशले अवैध रूपमा बसोबास गर्ने आमाबाबुबाट जन्मेका बच्चाहरूलाई जन्मसिद्ध नागरिकता दिने प्रणाली समाप्त गर्ने प्रयास गरेको थियो। तर, तल्लो अदालतहरूले यो आदेशमा रोक लगाएका थिए।
सर्वोच्च अदालतमा सुनुवाइको मिति अझै तय भएको छैन र अन्तिम निर्णय आउन धेरै महिना लाग्न सक्ने विश्वास गरिएको छ।
यो निर्णयले ट्रम्पको आप्रवासन नीति र अमेरिकी नागरिकताको परिभाषा दुबैमा गहिरो प्रभाव पार्न सक्नेछ।
सन् १८६८ देखि लागू संविधानको १४औं संशोधन अनुसार, अमेरिका जन्मेका प्रत्येक बच्चा अमेरिकी नागरिक हुने सिद्धान्त कायम छ। यद्यपि, यो नियम कूटनीतिज्ञ र विदेशी सैन्य कर्मचारीका बच्चाहरूमा लागू हुँदैन।
