काठमाडौं । अखिल (क्रान्तिकारी) केन्द्रीय समितिको तेस्रो बैठक सम्पन्न भएको छ। बैठकले संगठन सुदृढीकरण, विद्यार्थी आन्दोलनलाई थप प्रभावकारी बनाउने तथा पार्टीभित्र रहेका विद्यार्थी संगठनहरूको एकता प्रक्रियालाई अन्तिम निष्कर्षमा पुर्याउनेलगायत महत्वपूर्ण नीतिगत निर्णयहरू गरेको छ।
बैठकले विद्यार्थी संगठनबीचको एकता प्रक्रियालाई अब थप लम्ब्याउन नहुने निष्कर्ष निकाल्दै आवश्यक वार्ता, समन्वय र तयारीका कामलाई तीव्र गतिमा अघि बढाउने निर्णय गरेको छ। एकता प्रक्रियालाई व्यवस्थित र परिणाममुखी बनाउन वार्ता, समन्वय तथा प्रतिवेदन तयारीका लागि छुट्टाछुट्टै समिति गठन गर्ने निर्णयसमेत गरिएको छ।
यस्तै, संगठनलाई थप सशक्त र प्रभावकारी बनाउन प्रदेश, जिल्ला तथा स्थानीय तहसम्म संगठन विस्तार गर्ने, पुनर्गठन प्रक्रिया अघि बढाउने, नियमित प्रशिक्षण तथा वैचारिक अभियान सञ्चालन गर्ने निर्णय बैठकले गरेको छ। साथै डिजिटल प्रणालीमार्फत संगठन व्यवस्थापनलाई व्यवस्थित बनाउने र शैक्षिक तथा जनजीविकासँग सम्बन्धित मुद्दामा सशक्त हस्तक्षेप गर्ने नीति पनि तय गरिएको छ।
बैठकले पारित निर्णयहरूको प्रभावकारी कार्यान्वयनमार्फत संगठनलाई थप गतिशील, अनुशासित, उत्तरदायी र जनमुखी बनाउने प्रतिबद्धता व्यक्त गरेको छ।
अखिल (क्रान्तिकारी) का उपमहासचिव तथा उपत्यका विशेष प्रदेश समिति इन्चार्ज निरोज श्रेष्ठले बैठकले संगठनको भावी कार्यदिशा स्पष्ट गरेको बताए। उनले पार्टीभित्र रहेका विद्यार्थी संगठनहरूबीचको एकता प्रक्रियालाई अब अन्तिम टुंगोमा पुर्याइने जानकारी दिँदै नीतिगत निर्णयहरूको सफल कार्यान्वयनबाट विद्यार्थी आन्दोलनलाई नयाँ उचाइमा पुर्याउन सकिने विश्वास व्यक्त गरे।
