तेल अभिभ । हमासले बिहीबार गाजामा बन्दी बनाइएका चार जनाको शव इजरायललाई फिर्ता गरेको छ। सन् २०२३ को अक्टोबरयता हमासले बन्धकको शव फिर्ता गरेको यो पहिलो पटक हो।
रिहा गरिएका शवमा ३२ वर्षीया सिरिस बिबास र उनका दुई नाबालक छोराहरू—४ वर्षीय अरियल र ९ महिने किदोन को शव रहेका छन्। यी सबैलाई १६ महिनाअघि हमासले दक्षिण इजरायलको किबुत्ज निर ओजस्थित घरबाट अपहरण गरेको थियो।
चौथो शव ८३ वर्षीय ओदेद लिफ्शित्ज को हो, जसलाई हमासका लडाकुहरूले अपहरण गरेका थिए। हमासले ओदेद र उनकी पत्नी योचेभ्ड लिफ्शित्जलाई किबुत्ज निर ओजबाट अपहरण गरेर लगेको थियो। तर योचेभ्डलाई अक्टोबर २४, २०२३ मा नै रिहा गरिएको थियो।
हमासले शवहरूलाई गाजाको दक्षिणी सहर युनिस खानमा आयोजित एक कार्यक्रममा सार्वजनिक गर्दै चार वटा कालो कफिन रेड क्रसलाई हस्तान्तरण गरेको थियो। रेड क्रसमार्फत कफिनहरू गाजाभित्र रहेको इजरायली सेनाको नियन्त्रणमा पुगेको इजरायली अधिकारीहरूले पुष्टि गरेका छन्।
इजरायली सेनाले शवहरूलाई औपचारिक पहिचान र फरेन्सिक परीक्षणका लागि तेल अभिभस्थित अबु काबिर इन्स्टिच्युट अफ फरेन्सिक मेडिसिन मा लगिने जनाएको छ।
हाल गाजामा अझै १०० भन्दा बढी इजरायली बन्धकहरू रहेको अनुमान छ, जसमा केही मृत भइसकेको विश्वास गरिन्छ। बन्धकहरूको सुरक्षित रिहाइका लागि अन्तर्राष्ट्रिय दबाब बढ्दै गएको छ।
