काठमाडौं। प्रधानमन्त्री केपी शर्मा ओलीले स्वास्थ्य बीमा सुधारका लागि सुझाव कार्यदलको प्रतिवेदनका आधारमा छिटो कार्ययोजना तयार गर्न स्वास्थ्य तथा जनसंख्या मन्त्रालयलाई निर्देशन दिएका छन्।
आज बालुवाटारस्थित प्रधानमन्त्री निवासमा कार्यदलको प्रतिवेदनबारे ब्रिफिङ लिँदै प्रधानमन्त्री ओलीले निरोगी नेपाल बनाउने लक्ष्यलाई ध्यानमा राखेर नागरिकलाई सूशिक्षित बनाउनुका साथै उपचार खर्च अभावमा कुनै पनि बिरामीले सेवाबाट वञ्चित हुन नदिन आवश्यक कदम चाल्नुपर्ने बताए।
प्रधानमन्त्रीले स्वास्थ्य बीमा कार्यक्रमलाई व्यवहारिक र प्रभावकारी बनाउँदै सुधारका लागि एक साताभित्र कार्ययोजना प्रस्तुत गर्न निर्देशन दिएका हुन्।
स्वास्थ्य तथा जनसंख्या मन्त्री प्रदीप पौडेल, कार्यदल संयोजक डा. शम्भु आचार्य, सदस्य डा. भगवान कोइराला, डा. रघुराम काफ्ले, र सदस्यसचिव डा. सरोज शर्माले प्रधानमन्त्रीलाई स्वास्थ्य बीमा कार्यक्रमका नीतिगत, कानुनी, र संरचनागत सुधार आवश्यक रहेको जानकारी गराएका थिए।
कार्यदलका अनुसार हाल स्वास्थ्य बीमा कार्यक्रमअन्तर्गत करिब ११ अर्ब रुपैयाँ भुक्तानी गर्न बाँकी छ। यो कार्यक्रममा कुल जनसंख्याको २७ प्रतिशत नागरिक सहभागी छन्, जसमा ४८ प्रतिशतले सेवा लिएका छन्। सबै नागरिकलाई अनिवार्य सहभागी गराउने र गरिबीको रेखामुनि रहेका सबै नागरिकलाई निःशुल्क स्वास्थ्य सेवा उपलब्ध गराउनुपर्ने सुझाव कार्यदलले दिएको छ।
त्यसैगरी, आधारभूत स्वास्थ्यसेवा र अन्य सामाजिक सुरक्षाका कोषहरूसँग स्वास्थ्य बीमा कार्यक्रमलाई एकीकृत गर्नुपर्नेमा पनि कार्यदलले जोड दिएको छ। कार्यदलले गत पुस १४ गते मन्त्रालयलाई प्रतिवेदन बुझाएको थियो।
