काठमाडौँ: विसं २०३३ मा नेपाली कांग्रेस निकट नेपाल विद्यार्थी संघबाट आफ्नो राजनीतिक यात्रा सुरु गर्नुभएका सुरेन्द्रराज आचार्य हाल प्रतिनिधिसभाका सांसद हुनुहुन्छ । पूर्व महिला, बालबालिका तथा ज्येष्ठ नागरिकमन्त्री समेत रहनुभएका आचार्य कांग्रेस लुम्बिनी प्रदेशका महामन्त्री हुनुहुन्छ । कपिलवस्तु जिल्ला सभापति हुँदै २०६९ मा संविधानसभा सदस्य बन्नुभएका उहाँ २०७९ को प्रतिनिधिसभा निर्वाचनमा कपिलवस्तु–२ बाट ३९,०१४ मत प्राप्त गरी निर्वाचित हुनुभएको हो ।
राससका लागि सुशील दर्नालसँग कुराकानी गर्दै सांसद आचार्यले भ्रष्टाचार, रोजगारी, सङ्घीयता र विकासका विविध पक्षमा विचार राख्नुभयो ।
भ्रष्टाचारको अन्त्य प्राथमिकता
सांसद आचार्यले भ्रष्टाचारलाई देशको रोगको रुपमा चित्रण गर्दै यसको अन्त्य आवश्यक रहेको बताउनुभयो । स्थानीय तहदेखि केन्द्रसम्मको शासन प्रणालीमा भ्रष्टाचार व्याप्त भएकाले तीनै तहको सरकार मिलेर सुशासन कायम गर्नुपर्ने उहाँको भनाइ छ । उहाँले भन्नुभयो, “सरकारले जनताको अपेक्षा अनुसार काम गर्न नसक्दा निराशा बढेको छ । यसले राजसंस्थाप्रतिको मोह होइन, नेताहरुको व्यवहारप्रतिको असन्तुष्टि देखिएको हो ।”
रोजगारी सिर्जनामा जोड
युवाशक्ति पलायन समस्याबारे टिप्पणी गर्दै सांसद आचार्यले देशमै रोजगारी सिर्जना गर्नुपर्ने धारणा व्यक्त गर्नुभयो । “देशभित्र रोजगारीका अवसर नहुँदा युवाहरू विदेशिन बाध्य भएका छन्,” उहाँले भन्नुभयो, “शिक्षामा सुधार, उद्योग स्थापना र पर्यटन विकासमार्फत रोजगारी सिर्जना गर्न सकिन्छ ।” उहाँले पर्यटनको सम्भावना रहेका स्थानहरूमा पूर्वाधार विकास गरेर युवालाई आकर्षित गर्नुपर्ने बताउनुभयो ।
सङ्घीयता कार्यान्वयनमा समस्या
संविधान संशोधनको आवश्यकता औंल्याउँदै सांसद आचार्यले सङ्घीयता कार्यान्वयनमा कानुनी जटिलता रहेको उल्लेख गर्नुभयो । उहाँका अनुसार प्रदेशस्तरमा आवश्यक कानुन बन्न नसक्दा अधिकारको दोहोरोपन देखिएको छ । निजामति प्रशासन र प्रहरी व्यवस्थापन, कर्मचारी सरुवा लगायतका विषयमा स्पष्टता नहुनु समस्याको जड भएको उहाँको भनाइ छ ।
संविधानप्रति जनताको भावना बुझ्नुपर्ने
सांसद आचार्यले संविधानप्रति जनतामा वितृष्णा नफैलियोस् भन्नका लागि समयसापेक्ष संशोधन आवश्यक रहेको बताउनुभयो । “जनताको चाहना अनुसार कानुन, नीति नियम निर्माण गरिएन भने निराशा बढ्दै जान्छ,” उहाँले भन्नुभयो, “जहाँ समस्या छ, त्यहाँ सुधार गर्न सके मात्रै संविधानप्रति जनताको विश्वास कायम रहन्छ ।”
कपिलवस्तुको समस्या र सम्भावना
कपिलवस्तुमा उद्योगधन्दा सीमित रहेकाले कृषि नै मुख्य पेशा रहेको सांसद आचार्यले बताउनुभयो । उहाँले सिँचाइ र मलखादको समयमै उपलब्धता, जमिनको चक्लाबन्दी, तारबारको व्यवस्था जस्ता कुराले कृषि उत्पादन बढाउन सकिने धारणा राख्नुभयो । उहाँले भन्नुभयो, “किसानको खेत टुक्राटुक्रा हुँदा सिँचाइको लाभ लिन सक्दैनन् । चक्लाबन्दीको व्यवस्था भएमा किसान कृषिप्रति आकर्षित हुन्छन् ।”
अबको ध्यान—जनताको आधारभूत समस्या समाधानतर्फ
सांसद आचार्यले अबको योजना सडक, पुल निर्माण, शिक्षा र स्वास्थ्यजस्ता जनताको प्रत्यक्ष सरोकारका क्षेत्रमा केन्द्रित रहने जानकारी दिनुभयो । उहाँले रोजगारी सिर्जनालाई प्राथमिकतामा राख्दै किसानका समस्या संसद्मा निरन्तर उठाउने प्रतिवद्धता व्यक्त गर्नुभयो ।
