काठमाडौं:राष्ट्रिय प्रजातन्त्र पार्टी (राप्रपा)का उपाध्यक्ष बुद्धिमान तामाङले सरकारले प्रस्तुत गरेको आगामी आर्थिक वर्षको नीति तथा कार्यक्रमप्रति कडा आपत्ति जनाएका छन्।
सोमबार प्रतिनिधि सभाको बैठकमा बोल्दै तामाङले राष्ट्रपति रामचन्द्र पौडेलद्वारा प्रस्तुत नीति तथा कार्यक्रम संविधानविपरीत रहेको दाबी गरे। उनले सरकारको दस्तावेजमा “वर्तमान व्यवस्थाविरुद्ध हुने गतिविधिको प्रतिवाद गर्ने” भनिएको उल्लेख गर्दै, जनमतबाट व्यवस्थाको विकल्प खोज्न सकिने संवैधानिक प्रावधान हुँदाहुँदै यस्तो नीति संविधानको मर्मविपरीत भएको बताए।
“यदि यो नीति अराजकता रोक्नका लागि हो भने ठीक छ,” तामाङले भने, “तर फरक विचार भएका पार्टीहरूलाई लक्षित गरी लेखिएको हो भने म यसको घोर विरोध गर्छु। यो संविधानले दिएको अधिकारमाथिको हस्तक्षेप हो।”
उनले सरकारलाई चेतावनी दिँदै फरक विचार राख्ने दलहरूलाई दबाउन खोजिए त्यसको प्रतिवाद हुने स्पष्ट पारे। “सार्वभौमसत्ता नेपाली जनतामा निहित छ। स्वाधीनता, अखण्डता जोगाउने सर्तमा जनताले व्यवस्था परिवर्तन गर्न पाउने अधिकार छ,” उनले भने, “त्यसैले यस्ता संविधानविरोधी शब्दहरू नीति तथा कार्यक्रमबाट फिर्ता लिन म जोडदार माग गर्छु।”
उपाध्यक्ष तामाङले सबै विचार समेटेर राष्ट्रिय सहमतिमा संविधान संशोधन गर्नुपर्ने आवश्यकता पनि औंल्याए।
