काठमाडौँ: नेपाल विद्युत प्राधिकरणले चालु आर्थिक वर्ष २०८१–८२ को पहिलो छ महिनामा ११ अर्ब ३६ करोड रूपैयाँ नाफा आर्जन गरेको छ।
सूचनाको हक सम्बन्धी ऐनअन्तर्गत सार्वजनिक गरिएको (स्वतः प्रकाशन) विवरणअनुसार, प्राधिकरणले विद्युत बिक्री, ब्याज, तथा अन्य स्रोतहरूबाट ७० अर्ब ४४ करोड रूपैयाँ आम्दानी गरेको छ।
यस अवधिमा विद्युत खरिद, प्रशासनिक खर्च, तथा विभिन्न आयोजनाहरूमा ५९ अर्ब आठ करोड रूपैयाँ खर्च भएको छ।
नाफा वृद्धिको निरन्तरता
२०७२–७३ मा ८ अर्ब ८९ करोड रूपैयाँ घाटामा रहेको प्राधिकरण त्यसपछिका वर्षहरूमा लगातार नाफामा रहँदै आएको छ। गत आर्थिक वर्ष २०८०–८१ मा प्राधिकरणले १४ अर्ब ४६ करोड रूपैयाँ नाफा आर्जन गरेको थियो।
प्राधिकरणले कमाएको नाफा विद्युत उत्पादन, प्रसारण, वितरण, तथा विद्युतीकरणका पूर्वाधार विस्तार र सुदृढीकरणका आयोजनाहरूमा लगानी गर्दै आएको छ।
विद्युत बिक्री र खरिद विवरण
चालु आर्थिक वर्षको पहिलो छ महिनामा मात्र प्राधिकरणले विद्युत बिक्रीबाट ५३ अर्ब १८ करोड रूपैयाँ संकलन गरेको छ।
यस अवधिमा प्राधिकरणले सहायक तथा सम्बद्ध कम्पनीहरूबाट एक अर्ब १५ करोड रूपैयाँ बराबरको विद्युत र निजी उत्पादक कम्पनीहरूबाट पाँच अर्ब १६ करोड रूपैयाँ बराबरको विद्युत खरिद गरेको छ।
