काठमाडौं। इजरायलका प्रधानमन्त्री बेन्जामिन नेतन्याहुले देशको सुरक्षालाई थप मजबुत बनाउन अमेरिकामाथिको सैन्य निर्भरता घटाउँदै स्वदेशमै हतियार उत्पादन क्षमता विकास गर्नुपर्ने बताएका छन्।
वेस्ट बैंकस्थित एक सैन्य कार्यक्रममा अधिकारीहरूलाई सम्बोधन गर्दै उनले अमेरिकाले दशकौँदेखि इजरायललाई निरन्तर सहयोग गर्दै आएको र त्यसप्रति आफू कृतज्ञ रहेको बताए। तर भविष्यमा इजरायलले आफ्ना सुरक्षा आवश्यकताहरू आफैँ पूरा गर्न सक्ने गरी रक्षा उत्पादनमा आत्मनिर्भर बन्नुपर्नेमा उनले जोड दिए।
नेतन्याहुले हाल इजरायल इरान तथा उसका सहयोगी समूहहरूसँगको संघर्षमा रहेको उल्लेख गर्दै ती पक्षलाई उल्लेखनीय क्षति पुर्याइएको दाबी गरे। यद्यपि, सुरक्षा चुनौती अझै समाप्त नभएको र लडाइँ जारी रहेको उनले स्पष्ट पारे।
उनले आगामी दिनमा इजरायलको सुरक्षा र स्थायित्व उसको आफ्नै सैन्य क्षमतामा निर्भर रहने बताउँदै देशको रक्षा संरचनालाई अझ सुदृढ बनाउन आवश्यक रहेको धारणा व्यक्त गरे।
