काठमाडौं: उर्दूका प्रसिद्ध कवि फैज अहमद फैजको कविता ‘हम देखेंगे’ वाचन गरिएकोमा भारतको महाराष्ट्र राज्यमा देशद्रोहको मुद्दा दर्ता गरिएको छ।
मे १३ मा नागपुरमा प्रख्यात अम्बेडकरवादी समाजसेवी वीर सथिदारको सम्झनामा आयोजित कार्यक्रममा फैजको चर्चित कविता वाचन गरिएको थियो। उक्त कार्यक्रममा दिइएको अभिव्यक्तिलाई लिएर मे १६ मा जन संघर्ष समिति नामक स्थानीय संस्थाका अध्यक्ष दत्तात्रेय शिर्केले उजुरी दर्ता गरेपछि मुद्दा दर्ता गरिएको हो।
कार्यक्रम वीर सथिदारकी श्रीमती पुष्पा सथिदारको संयोजनमा आयोजना गरिएको थियो। नागपुरको सीताबुल्डी प्रहरी चौकीमा उजुरी दर्ता भएपछि आयोजक र सहभागीहरू विरुद्ध मुद्दा दर्ता गरिएको छ, जसमा देशद्रोहसम्बन्धी धारा पनि समावेश छ।
शिर्केले उजुरीमा कार्यक्रमको क्रममा “भडकाउने र आपत्तिजनक” अभिव्यक्ति दिइएको आरोप लगाएका छन्। उनले फैजको कविता वाचनपछि एक कलाकारले दिएको अभिव्यक्तिलाई विवादास्पद भनेका छन्। उजुरीमा “सब ताज उछाले जाएंगे, सब तख़्त गिराए जाएंगे…” जस्ता कविताका पंक्तिहरू उल्लेख गर्दै ती शब्दहरूले संवेदनशील वातावरण सिर्जना गरेको दाबी गरिएको छ।
शिर्केले बीबीसी मराठीलाई भनेअनुसार, उनले कार्यक्रमको भिडियो एबीपी माझा च्यानल र युट्युबमा हेरेर उजुरी दर्ता गरेका हुन्। उनले कार्यक्रममा प्रयोग गरिएको भाषा अधिनायकवादी प्रवृत्तिविरुद्ध भएको र सरकारलाई अस्थिर बनाउने आशय भएको जिकिर गरेका छन्।
नागपुर प्रहरीले उजुरीको आधारमा कार्यक्रम आयोजक पुष्पा सथिदार, एक अज्ञात पुरुष, एक अज्ञात महिला लगायत अन्य विरुद्ध भारतीय न्याय संहिता (BNS) का धारा १५२ (देशद्रोह), १९६ (समुदायबीच विद्वेष फैलाउने), ३५३ (अफवाह तथा सार्वजनिक शान्ति भंग गर्ने प्रयास) तथा ३(५) अन्तर्गत मुद्दा दर्ता गरेको जनाएको छ।
प्रहरी निरीक्षक राखी गेडामका अनुसार, उजुरीमा आयोजकहरूले “जानाजानी जनतालाई भ्रमित गर्ने र देशको सार्वभौमिकतामा आँच पुर्याउने” कार्य गरेको आरोप छ। हाल मुद्दाको अनुसन्धान जारी छ।
