काठमाडौं । प्रधानमन्त्री तथा मन्त्रिपरिषद्को कार्यालयको नाम दुरुपयोग गर्दै राष्ट्रसेवक कर्मचारीलाई धम्की दिएको आरोपमा २२ वर्षीय प्रकाश खड्का पक्राउ परेका छन्।
सुर्खेतको वीरेन्द्रनगर नगरपालिका–६ स्थायी घर भई हाल काठमाडौंको शंखमुल बस्दै आएका खड्कालाई प्रहरीले नियन्त्रणमा लिएको हो। जिल्ला प्रहरी परिसर काठमाडौंका प्रमुख रमेश थापा का अनुसार उनलाई पक्राउ गरी आवश्यक अनुसन्धान प्रक्रिया अघि बढाइएको छ।
प्रहरीका अनुसार खड्काले “प्रधानमन्त्री कार्यालयबाट बोलेको” भन्दै दैलेखको दुल्लु नगरपालिका–१३ का वडासचिव कमल भण्डारी लाई फोनमार्फत धम्की दिएका थिए। उनले असभ्य, अशिष्ट र अमर्यादित भाषा प्रयोग गर्दै दबाब सिर्जना गरेको आरोप छ।
सो टेलिफोन संवादको अडिओ सामाजिक सञ्जालमा भाइरल भएपछि घटना सार्वजनिक भएको थियो।
घटनापछि प्रधानमन्त्री तथा मन्त्रिपरिषद्को कार्यालयले गम्भीर ध्यानाकर्षण भएको जनाएको छ। प्रधानमन्त्री कार्यालयका प्रवक्ता हेमराज अर्याल ले विज्ञप्ति जारी गर्दै सम्बन्धित सुरक्षा तथा अनुसन्धान निकायलाई तत्काल कानुनी कारबाही अघि बढाउन निर्देशन दिइएको जानकारी दिएका छन्।
विज्ञप्तिमा प्रधानमन्त्री Balen Shah सुशासन, विधिको शासन तथा राष्ट्रसेवक कर्मचारीको व्यावसायिक सुरक्षा र मनोबलप्रति प्रतिबद्ध रहेको उल्लेख गरिएको छ।
सरकारले विधिको शासनलाई चुनौती दिने जोकोहीमाथि कानुनअनुसार कडा कारबाही गरिने चेतावनी पनि दिएको छ।
प्रधानमन्त्री कार्यालयले आफ्नो नाम, सचिवालय वा प्रधानमन्त्रीको नाम प्रयोग गरेर कसैले धम्की, बार्गेनिङ वा नाजायज दबाब सिर्जना गरेमा भ्रममा नपर्न सर्वसाधारणलाई आग्रह गरेको छ।
यस्ता शंकास्पद फोन वा गतिविधिबारे तत्काल नजिकको सुरक्षा निकाय वा प्रधानमन्त्री कार्यालयलाई जानकारी गराउन पनि अपिल गरिएको छ।
