काठमाडौं । बागमती प्रदेशको उद्योग, वाणिज्य, भूमि तथा प्रशासन मन्त्रालयकी मन्त्री विन्दु श्रेष्ठले तीन तहका सरकारबीच प्रभावकारी सहकार्य नहुँदा उद्योगी व्यवसायीहरूले दोहोरो–तेहेरो कर तिर्नुपरेको गुनासो बढिरहेको बताएकी छन्।
नेपाल उद्योग वाणिज्य संघ काठमाडौंको साधारणसभा तथा तेस्रो अधिवेशनलाई सम्बोधन गर्दै उनले स्थानीय, प्रदेश र संघीय सरकारबीच समन्वय अभावका कारण उद्योग व्यवसाय सञ्चालनमा समस्या देखिएको बताइन्।
उनले भनिन्, “उद्योग व्यवसाय प्रवर्द्धनका क्रममा स्थानीय तह, प्रदेश र संघको सहकार्य नभएकै कारण धेरै उद्योग व्यवसायीहरूले दोहोरो–तेहेरो कर तिर्नुपर्ने गुनासो आइरहेको छ। बागमती सरकारले यसलाई गम्भीर रूपमा लिएको छ।”
मन्त्री श्रेष्ठले तीन तहका सरकारबीच समन्वय बिना समस्या समाधान नहुने स्पष्ट पारिन्। उनले करको दर बढाउनेभन्दा पनि करको दायरा विस्तार गर्नुपर्ने आवश्यकता रहेकोमा जोड दिइन्।
उनका अनुसार एकद्वार प्रणालीमार्फत सेवा प्रवाह गर्ने प्रयास भइरहेको छ। बागमती प्रदेशअन्तर्गतका १३ जिल्ला कार्यालयमध्ये काभ्रे र चितवन जिल्ला कार्यालयले एकद्वार प्रणाली सेवा सुरु गरिसकेको उनले जानकारी दिइन्।
ती कार्यालयमार्फत सेवाग्राहीले २० देखि २५ मिनेटभित्र सेवा प्राप्त गर्ने गरी नमुना कार्यालयको रूपमा विकास भइरहेको मन्त्री श्रेष्ठले बताइन्।
