काठमाडौं। चीनमा शक्तिशाली भूकम्पका कारण मृत्यु हुनेको संख्या ९५ पुगेको छ। चीनको सरकारी मिडिया चाइना ग्लोबल टेलिभिजन नेटवर्क (CGTN) ले मृत्युको संख्या बढेको जानकारी दिएको हो।
मङ्गलबार बिहान तिब्बतको सिजाङ स्वायत्त क्षेत्रअन्तर्गत सिगाजे सहरको डिङ्ग्री काउन्टीमा गएको शक्तिशाली भूकम्पले ठूलो जनधनको क्षति पुर्याएको छ। चिनियाँ समाचार एजेन्सी सिन्ह्वाका अनुसार उद्धार कार्य जारी छ, र मृतक तथा घाइतेहरूको संख्या अझै बढ्न सक्ने अनुमान गरिएको छ।
चीनका राष्ट्रपति सी जिनपिङले भूकम्प प्रभावित क्षेत्रमा जीवन रक्षाको प्राथमिकता दिन र हताहतीलाई कम गर्न उद्धारका सबै उपलब्ध स्रोत र संयन्त्र परिचालन गर्न निर्देशन दिएका छन्। क्षेत्रीय प्रकोप राहत मुख्यालयले भूकम्प प्रभावित क्षेत्रमा उद्धार टोलीहरू खटाएको छ।
चाइना अर्थक्वेक नेटवर्क सेन्टर (CENC) का अनुसार भूकम्पको केन्द्रबिन्दु २८.५ डिग्री उत्तरी अक्षांश र ८७.४५ डिग्री पूर्वी देशान्तरमा रहेको थियो। यो भूकम्प करिब १० किलोमिटर गहिराइमा गएको बताइएको छ।
भूकम्पका कारण घरहरू ध्वस्त भएका, सडक तथा सञ्चार सेवा अवरुद्ध भएका, र हजारौँ मानिस विस्थापित भएका छन्। स्थानीय प्रशासनले प्रभावितलाई अस्थायी आवास तथा राहत सामग्री उपलब्ध गराउन आपतकालीन सेवा सञ्चालन गरेको छ।
यस भूकम्पका पराकम्पहरू आसपासका क्षेत्रमा समेत महसुस गरिएको थियो। विशेषगरी हिमाली क्षेत्रमा रहेको डिङ्ग्री काउन्टीमा भौगोलिक बनावटका कारण उद्धार प्रयासमा थप चुनौती भएको स्थानीय अधिकारीहरूले जनाएका छन्।
यसैबीच, अन्तर्राष्ट्रिय संस्थाहरूले पनि चीनलाई सहयोगका लागि तयारी अवस्थामा रहेको जनाएका छन्। प्राकृतिक प्रकोपको यो घटनाले तिब्बत क्षेत्रको भौगोलिक संवेदनशीलतालाई पुनः सतहमा ल्याएको छ।
