काठमाडौं: युक्रेनी राष्ट्रपति भोलोडिमिर जेलेन्स्कीले आइतबार रूसविरुद्ध दबाब सिर्जना नगरी युद्ध अन्त्य सम्भव नरहने चेतावनी दिएका छन्। उनले रूसमाथि कडा प्रतिबन्ध लगाउन र युक्रेनलाई निरन्तर सहयोग आवश्यक भएको बताएका छन्।
“आज ५४ औं दिन हो जब रूसले पूर्ण युद्धविरामका लागि अमेरिकी प्रस्तावलाई बेवास्ता गरेको छ,” उनले एक्स (पूर्व ट्विटर) मा लेखे। “हामी विश्वास गर्छौं कि युद्धविराम जुनसुकै बेला सुरु हुन सक्छ — आजैदेखि पनि — र कूटनीतिलाई वास्तविक मौका दिन कम्तिमा ३० दिनको अवधि आवश्यक छ।”
उनले तीन कुरामा जोड दिए —
१. रूसमाथि कडा प्रतिबन्ध,
२. युक्रेनलाई निरन्तर समर्थन, र
३. युरोपभरि रक्षा सहकार्यको विस्तार।
“रुसले जान्नुपर्छ कि युरोपेलीहरूले आफूलाई बचाउने क्षमता राख्छन्,” जेलेन्स्कीले भने।
प्रागमा चेक राष्ट्रपति पावेलसँग भेट
मे ४, आइतबार, जेलेन्स्कीले चेक गणतन्त्रका राष्ट्रपति पिटर पावेलसँग प्रागमा भेटवार्ता गरे। रोयटर्सका अनुसार संयुक्त पत्रकार सम्मेलनमा उनले युक्रेनका अन्तर्राष्ट्रिय सहयोगीहरूलाई रूसमाथि थप दबाब दिन आह्वान गरे।
उनको भनाइ अनुसार रूसमाथिको दबाबले मात्र युद्धविरामको वातावरण सिर्जना गर्न सक्छ र कूटनीतिक पहल सफल बन्न सक्छ।
