काठमाडौं । आज विश्वभर अन्तर्राष्ट्रिय योग दिवस विभिन्न कार्यक्रमका साथ मनाइँदै छ। हरेक वर्ष जुन २१ मा मनाइने यस दिवसले योगको महत्व र यसको सकारात्मक प्रभावबारे विश्वव्यापी जनचेतना फैलाउने उद्देश्य राखेको छ।
योगलाई शारीरिक, मानसिक तथा भावनात्मक स्वास्थ्यसँग जोडेर हेर्ने गरिन्छ। यही महत्वलाई अन्तर्राष्ट्रिय स्तरमा प्रवर्द्धन गर्न संयुक्त राष्ट्रसंघले जुन २१ लाई अन्तर्राष्ट्रिय योग दिवसका रूपमा मान्यता दिएको हो।
सन् २०१४ मा संयुक्त राष्ट्रसंघको महासभामा अन्तर्राष्ट्रिय योग दिवससम्बन्धी प्रस्ताव प्रस्तुत गरिएको थियो। सदस्य राष्ट्रहरूको व्यापक समर्थनपछि उक्त प्रस्ताव पारित भएको थियो र जुन २१ लाई अन्तर्राष्ट्रिय योग दिवस घोषणा गरिएको थियो।
त्यसयता सन् २०१५ देखि विश्वभर विभिन्न कार्यक्रम आयोजना गर्दै यो दिवस मनाउने परम्परा रहँदै आएको छ। यस अवसरमा योग अभ्यास, जनचेतनामूलक अभियान, प्रशिक्षण कार्यक्रम तथा विशेष समारोहहरू आयोजना गरिन्छन्।
योगले स्वस्थ जीवनशैली, मानसिक शान्ति र शारीरिक तन्दुरुस्तीमा योगदान पुर्याउने विश्वास गरिन्छ। यही सन्देश फैलाउन आज नेपालसहित विश्वका विभिन्न देशमा योगसम्बन्धी विविध कार्यक्रम सञ्चालन भइरहेका छन्।
