काठमाडौं । राष्ट्रिय प्रजातन्त्र पार्टी (राप्रपा) का नेता तथा राष्ट्रिय प्रजातान्त्रिक युवा सङ्गठनका निवर्तमान केन्द्रीय अध्यक्ष फणीराज लोहनी (राजु) ले पार्टी परित्यागको घोषणा गरेका छन्। लामो समयदेखि राप्रपाको राजनीतिमा सक्रिय रहेका लोहनीले नेतृत्वको कार्यशैलीप्रति असन्तुष्टि जनाउँदै साधारण सदस्यसमेत नरहने गरी राजीनामा दिएका हुन्।
बुधबार जारी प्रेस विज्ञप्तिमार्फत लोहनीले आफ्नो जीवनको महत्वपूर्ण समय राप्रपामा बिताएको स्मरण गर्दै राजसंस्था, हिन्दु राष्ट्र र संघीयता खारेजीको एजेन्डाप्रति आफू सधैं प्रतिबद्ध रहने बताएका छन्।
पार्टीभित्र पछिल्लो समय बढ्दो सैद्धान्तिक विचलन, नेतृत्वको कार्यशैली र आन्तरिक वातावरणका कारण पार्टी सही दिशामा अघि बढ्न नसक्ने निष्कर्षमा पुगेको उनको भनाइ छ।
लोहनीले फरक मत राख्नेहरूमाथि कारबाहीको डर देखाउने प्रवृत्ति बढेको आरोप लगाउँदै पार्टीभित्र लोकतान्त्रिक अभ्यास कमजोर बन्दै गएको दाबी गरेका छन्। उनले नेतृत्वको निरङ्कुश शैलीले अन्ततः संगठनलाई संकटतर्फ धकेल्ने निष्कर्षमा आफू पुगेको बताएका छन्।
उनका अनुसार निर्वाचनपछिको समीक्षा र नेतृत्व परिवर्तनको अपेक्षाविपरीत नेतृत्वले कार्यकर्तामाथि दबाब बढाएको, संस्थापक नेताहरूको सम्मान गर्न नसकेको तथा महाधिवेशनसम्बन्धी निर्णयसमेत कार्यान्वयन नगरेको विषयले असन्तुष्टि थप बढाएको हो।
लोहनीले पार्टीभित्र रहेर निष्क्रिय बन्नुभन्दा आफ्नो अन्तरआत्माको आवाजअनुसार पार्टी छोड्ने निर्णय गरेको उल्लेख गर्दै राप्रपामा रहँदा साथ, सहयोग र मार्गदर्शन गर्ने नेता, कार्यकर्ता तथा शुभेच्छुकहरूप्रति आभार व्यक्त गरेका छन्।
वर्तमान नेतृत्वसँग व्यक्तिगत द्वेष नरहेको स्पष्ट पार्दै उनले भविष्यमा राष्ट्रवादी एजेन्डामा सहकार्य र सहयात्राको सम्भावना भने खुला रहेको संकेत गरेका छन्। आजकै मितिबाट पार्टीसँगको आफ्नो औपचारिक सम्बन्ध समाप्त भएको उनले घोषणा गरेका छन्।
