काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने आज भारत भ्रमणमा जाँदै छन्। भारतीय जनता पार्टी (भाजपा) अध्यक्ष नितिन नवीनको निमन्त्रणामा नेपाली प्रतिनिधिमण्डलको नेतृत्व गर्दै उनी भारत प्रस्थान गर्न लागेका हुन्।
रास्वपाका अनुसार लामिछाने दिउँसो १ बजे भारत जाने कार्यक्रम रहेको छ। भ्रमण टोलीमा उनकी पत्नी निकिता, पार्टीका सहमहामन्त्री विपिन आचार्य, सचिवालय सदस्य दीपक बोहोरा तथा प्रदीप आचार्य सहभागी छन्।
रास्वपाले आइतबार राति जारी गरेको विज्ञप्तिअनुसार जेठ १८ देखि २२ गतेसम्म हुने भ्रमणका क्रममा सभापति लामिछानेले नयाँदिल्लीमा उच्चस्तरीय राजनीतिक तथा कूटनीतिक भेटघाट गर्ने कार्यक्रम रहेको छ।
पार्टी प्रवक्ता मनीष झाले जारी गरेको विज्ञप्तिमा भाजपा नेतृत्वसँग छलफल गर्नुका साथै भारतमा रहेका नेपाली समुदाय तथा पार्टी समर्थकहरूसँग भेटघाट गर्ने कार्यक्रम रहेको उल्लेख गरिएको छ। भ्रमणका क्रममा व्यक्तिगत रूपमा अयोध्या जाने कार्यक्रम पनि तय भएको बताइएको छ।
नयाँदिल्लीस्थित नेपाली दूतावासले भ्रमणका विभिन्न कार्यक्रम समन्वय गरिरहेको जनाइएको छ।
रास्वपाले औपचारिक जानकारी सार्वजनिक गर्नुअघि नै भाजपाले पनि लामिछानेको भ्रमणबारे जानकारी सार्वजनिक गरेको थियो। भाजपाको विज्ञप्तिअनुसार प्रतिनिधिमण्डलले अध्यक्ष नितिन नवीनसहित पार्टीका वरिष्ठ नेताहरूसँग भेटवार्ता गर्ने कार्यक्रम छ।
यद्यपि दुवै पक्षको विज्ञप्तिमा उल्लेख नगरिए पनि स्रोतका अनुसार भ्रमणका क्रममा भारतीय प्रधानमन्त्री, विदेशमन्त्री तथा अन्य उच्च नेतृत्वसँग भेटवार्ताको प्रयास भइरहेको बताइएको छ। यद्यपि भेटघाटको अन्तिम समय भने तय भइसकेको छैन।
भारतीय विदेश सचिवको नेपाल भ्रमण स्थगित भएको र नेपालका नवनिर्वाचित प्रधानमन्त्रीको परम्परागत भारत भ्रमण अझै तय नभएको अवस्थामा सत्तारूढ दलका शीर्ष नेताको यो भ्रमणलाई राजनीतिक तथा कूटनीतिक रूपमा चासोका साथ हेरिएको छ।
भाजपाको वैदेशिक मामिला विभागका अनुसार भ्रमणको मुख्य उद्देश्य रास्वपा र भाजपाबीच पार्टी–टु–पार्टी सम्बन्ध विस्तार, संगठनात्मक अनुभव आदानप्रदान तथा लोकतान्त्रिक अभ्यासमा सहकार्य बढाउनु रहेको छ।
