काठमाडौं । नेपाल राष्ट्र बैंकले प्रतिनिधि सभा सदस्यको आमनिर्वाचनलाई लक्षित गर्दै सार्वजनिक बिदाका दिनमा समेत सीमित बैंकिङ सेवा सञ्चालन गर्न बैंक तथा वित्तीय संस्थालाई निर्देशन दिएको छ।
फागुन २१ गते हुने प्रतिनिधि सभा सदस्य निर्वाचनका अवसरमा सरकारले तीन दिन सार्वजनिक बिदा घोषणा गरे पनि अत्यावश्यक वित्तीय कारोबार प्रभावित नहोस् भन्ने उद्देश्यले राष्ट्र बैंकले सीमित सेवा खुला राख्न व्यवस्था मिलाएको हो।
निर्देशनअनुसार सरकारी कारोबार गर्ने एजेन्सी बैंकहरूले नियमित सेवा प्रवाह गर्नेछन्। साथै, राजनीतिक दल र उम्मेदवारहरूले निर्वाचन प्रचारप्रसारका लागि सञ्चालन गरेका बैंक खातामार्फत रकम दाखिला, भुक्तानी तथा अन्य आवश्यक वित्तीय सेवा उपलब्ध गराइनेछ।
निर्वाचन प्रक्रिया सहज र व्यवस्थित बनाउन बैंक तथा वित्तीय संस्थाका सम्बन्धित शाखाहरू आवश्यकताअनुसार सञ्चालनमा रहने व्यवस्था मिलाइएको निर्वाचन आयोगले जनाएको छ।
