काठमाडौं: संघीय संसद् अन्तर्गत आज दुई ओटा संसदीय समितिहरूको बैठक बस्दैछन्।अर्थ समिति र उद्योग, वाणिज्य तथा श्रम तथा उपभोक्ता हित समितिको बैठक आज सिंहदरबारमा निर्धारित छ।
अर्थ समितिको बैठक दिउँसो १२ बजे बस्नेछ। बैठकमा बैंक तथा वित्तीय संस्था सम्बन्धी ऐन, २०७३ संशोधन गर्न बनेको विधेयकका सन्दर्भमा सरोकारवालाहरू र विज्ञहरूसँग छलफल हुने कार्यसूची रहेको छ।
त्यस्तै, उद्योग, वाणिज्य तथा श्रम तथा उपभोक्ता हित समितिको बैठक बिहान ११ बजे बस्नेछ। सो बैठकमा निकासी पैठारी (नियमन) विधेयक, २०८१ माथि उद्योग, वाणिज्य तथा आपूर्ति मन्त्रालय र कानून, न्याय तथा संसदीय मामिला मन्त्रालयका प्रतिनिधिसँग छलफल गरिनेछ।
दुवै बैठक सिंहदरबारस्थित समितिको सभाकक्षमा बस्ने कार्यक्रम रहेको छ।
