काठमाडौं: अमेरिकी राष्ट्रपति डोनाल्ड ट्रम्पको नीतिको प्रभाव विश्वभरि परिरहेको छ। यसपटक यसको असर बेल्जियमकी भावी रानी राजकुमारी एलिजाबेथमाथि परेको छ, जो हार्वर्ड विश्वविद्यालयमा सार्वजनिक नीति अध्ययन गरिरहेकी छिन्।
राजकुमारी एलिजाबेथले हार्वर्डको स्नातकोत्तर कार्यक्रमअन्तर्गत पहिलो वर्ष पूरा गरिसकेकी छन्। तर, ट्रम्प प्रशासनको नयाँ नीतिले विदेशी विद्यार्थीहरूको भविष्य अन्योलमा पारेपछि उनको शैक्षिक यात्रा प्रभावित भएको छ। नयाँ निर्णयअनुसार हार्वर्डलगायतका केही विश्वविद्यालयमा विदेशी विद्यार्थीहरूको भर्ना अनुमति फिर्ता लिइएको छ, जसले एलिजाबेथको अध्ययनमा बाधा उत्पन्न गरेको हो।
२३ वर्षीया एलिजाबेथ अब अमेरिका छोड्नुपर्ने वा अर्को विश्वविद्यालयमा स्थानान्तरण हुनुपर्ने सम्भावना देखिएको छ। ट्रम्प प्रशासनको यो कदम अन्य विश्वविद्यालयहरूमा पनि लागू हुन सक्ने भएकाले चिन्ता बढेको हो।
बेल्जियमको शाही परिवारले ट्रम्पको निर्णयप्रति गहिरो चिन्ता व्यक्त गरेको छ। शाही परिवारका प्रवक्ता लोर भान्डुर्नले राजकुमारीले हालै पहिलो वर्ष पूरा गरेको जानकारी दिँदै भनिन्, “ट्रम्प प्रशासनको निर्णयको प्रभाव के कति हुन्छ भन्ने कुरा आगामी दिनमा प्रस्ट हुनेछ। हामी परिस्थितिको अध्ययन गरिरहेका छौं।”
सञ्चार निर्देशक जेभियर बार्टलेले पनि स्थिति मूल्यांकन भइरहेको बताएका छन्। उनका अनुसार “अब धेरै कुरा परिवर्तन हुन सक्छ।”
राजकुमारी एलिजाबेथ बेल्जियमका राजा फिलिप र रानी म्याथिल्डेकी जेठी छोरी तथा सिंहासनको पहिलो उत्तराधिकारी हुन्। हार्वर्डमा अध्ययन गर्नुअघि उनले अक्सफोर्ड विश्वविद्यालयबाट इतिहास र राजनीतिमा स्नातक गरेकी थिइन्।
हार्वर्ड विश्वविद्यालयले ट्रम्प प्रशासनको निर्णयको आलोचना गर्दै एक विज्ञप्ति जारी गरेको छ। विज्ञप्तिमा यो निर्णयलाई गैरकानुनी मात्र नभई विदेशी विद्यार्थीहरूलाई लक्षित गर्ने भेदभावपूर्ण कदम भनेर उल्लेख गरिएको छ।
