इस्लामाबाद: पाकिस्तानको दक्षिणपश्चिम बलुचिस्तान प्रान्तमा भएको बम विस्फोटमा तीन जना प्रहरीको ज्यान गएको छ भने १६ जना घाइते भएका छन्।
सरकारी प्रवक्ता शाहिद रिन्दका अनुसार विस्फोट मस्तुङ जिल्लाको कुन्द मसुरी क्षेत्रमा भएको हो। तालिम केन्द्रबाट फर्किंदै गरेका प्रहरीहरू चढेको गाडीलाई लक्षित गरी बम विस्फोट गराइएको जनाइएको छ।
घाइतेमध्ये दुई जनाको अवस्था गम्भीर रहेको छ। सबै घाइतेहरूलाई नजिकैको अस्पतालमा भर्ना गरिएको छ। प्रहरी टोली बलुचिस्तान नेशनल पार्टी–मेङ्गल (बीएनपी–एम)ले आयोजना गरेको धर्नाको सुरक्षामा खटिएको थियो।
विस्फोटपछि बोलन मेडिकल कलेज अस्पताल र क्वेटा सिभिल अस्पतालमा आपतकालीन सेवा सक्रिय पारिएको छ। घटनाबारे सरकारले छानबिन सुरु गरिसकेको छ र विस्तृत प्रतिवेदन मागिएको छ।
बलुचिस्तानका मुख्यमन्त्री सरफराज बुग्टीले घटनाको तीव्र निन्दा गर्दै घाइतेहरूको उपचारमा कुनै कमी हुन नदिन निर्देशन दिएका छन्। साथै, प्रान्तीय स्वास्थ्य मन्त्रीलाई उपचार कार्यको निगरानी गर्न आग्रह गरिएको छ।
हालसम्म कुनै समूहले आक्रमणको जिम्मेवारी लिएको छैन। बलुचिस्तान पाकिस्तानको सबैभन्दा ठूलो तर कम जनसंख्या भएको प्रान्त हो, जहाँ विगत केही वर्षदेखि सुरक्षाकर्मीहरूलाई लक्षित गरी हिंसात्मक गतिविधि भइरहेका छन्। यस्ता घटनाहरू पृथकतावादी समूहहरूसँग सम्बन्धित हुने गरेका छन्।
