काठमाडौं: म्यानमारमा गएको ७.७ म्याग्निच्युडको भूकम्पपछि सोमबार पनि उद्धार कार्य जारी रह्यो। म्यानमारको सैन्य सरकारका अनुसार मृतक संख्याले २ हजार नाघेको छ।
सैन्य प्रशासनले दिएको पछिल्लो विवरणअनुसार भूकम्पका कारण २,०५६ जनाको मृत्यु भएको छ। ३,९०० भन्दा बढी घाइते भएका छन् भने २७० जना अझै बेपत्ता छन्।
तर, म्यानमारको सैन्य नेतृत्वको इतिहास नै प्रकोपबाट हुने क्षतिको मात्रालाई दबाउने भएकाले वास्तविक तथ्याङ्क थाहा पाउन गाह्रो रहेको अन्तर्राष्ट्रिय सञ्चारमाध्यमहरूले जनाएका छन्।
यसैबीच, विश्व स्वास्थ्य संगठन (WHO) ले भूकम्प प्रभावितलाई सहयोग गर्न ८० लाख डलरको आपत्कालीन राहत कोषका लागि अपील गरेको छ।
संस्थाका प्रवक्ताका अनुसार भूकम्पबाट म्यानमारका अस्पतालहरू पनि क्षतिग्रस्त भएकाले घाइतेहरूको चाप थेग्न गाह्रो भइरहेको छ। उद्धार टोलीहरू प्रभावित क्षेत्रहरूमा पुग्न संघर्ष गरिरहेका छन्।
