काठमाडौं: नेकपा माओवादी केन्द्रले ‘जनतासँग माओवादीः तराई–मधेस जागरण अभियान’ केही समयका लागि स्थगित गरेको छ । पछिल्ला दिनहरूमा राजावादीहरू सक्रिय भइरहेका भन्दै माओवादी केन्द्रले अभियान रोक्ने निर्णय गरेको जनाएको छ ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीका अलोकप्रिय र लोकतन्त्रविरोधी कदमहरूकै कारण गणतन्त्रमाथि प्रहार हुन थालेको निष्कर्ष निकालेका छन् ।
प्रचण्ड आजै सिमरा हुँदै काठमाडौं फर्किने बताइएको छ । यसैबीच, माओवादी केन्द्रले राजावादीहरूको पछिल्लो गतिविधि बारे छलफल गर्न आइतबार पदाधिकारी बैठक बोलाएको छ ।
फागुन १२ गते झापाको कचनकवलबाट सुरु भएको माओवादीको जागरण अभियान आज रौतहटसम्म पुगेको
थियो ।
यता, राजावादीहरूले पूर्वराजा ज्ञानेन्द्र शाहको पोखराबाट काठमाडौं फर्किने कार्यक्रमलाई भव्य बनाउन र ठूलो जनउपस्थिति देखाउन तयारी गरिरहेका छन् ।
