गण्डकी: नेपाली राष्ट्रिय क्रिकेट टोलीका पूर्वकप्तान पारस खड्काले खेलकुद क्षेत्रको विकासका लागि राज्यबाट पर्याप्त लगानी नहुँदा असन्तुष्टि व्यक्त गर्नुभएको छ।
आइतबार पोखरामा आयोजित नेपाल साहित्य महोत्सवअन्तर्गत ‘फ्री हिटः एनपिएलभन्दा पर’ विषयक छलफलमा उहाँले खेलकुदको व्यावसायिक विकासका लागि सरकारले बजेट वृद्धि गर्नुपर्ने बताउनुभयो।
उहाँले भन्नुभयो, “मन्त्रालय बाँडफाँटका बेला खेलकुद मन्त्रालय राजनीतिक दलको सबैभन्दा कम प्राथमिकतामा पर्ने गरेको छ। युवालाई खेलकुदमा आकर्षित गर्न सबै पक्षले समन्वय गर्नुपर्छ।”
खड्काले खेलकुद पूर्वाधार तथा संरचना निर्माणमा सरकारले विशेष ध्यान दिनुपर्नेमा जोड दिँदै राज्यको भूमिकालाई अझ प्रभावकारी बनाउनुपर्ने धारणा व्यक्त गर्नुभयो।
