भक्तपुर: नेपाल मजदुर किसान पार्टी (नेमकिपा)को आठौँ महाधिवेशन आजदेखि भक्तपुरमा सुरू भएको छ। पार्टीका अनुसार महाधिवेशन यही फागुन १९ गतेसम्म सञ्चालन हुनेछ।
नेमकिपाका केन्द्रीय सदस्य सरोजराज गोसाईँका अनुसार महाधिवेशनमा देश तथा विदेशका विविध विषयमा बृहत् छलफल गर्दै विभिन्न एजेण्डा पारित गरिनेछ। यस महाधिवेशनमा काठमाडौँ, भक्तपुर, ललितपुरसहित सातै प्रदेशका विभिन्न जिल्लाबाट प्रतिनिधि, पर्यवेक्षक र कार्यकर्ताको सहभागिता रहनेछ।
आज बिहान १० बजे कमलविनायकको लान्चाफल्चा, मध्यपुरथिमिको बोडे, सूर्यविनायकको बस बिसौनी, काठमाडौँको कोटेश्वर, ताथलीलगायत स्थानबाट बाजागाजा, झाँकी र सांस्कृतिक कार्यक्रमसहित जुलुस निकालिएको छ, जसले दिउँसो १ बजे सल्लाघारीमा पुगेर उद्घाटनसत्रमा परिणत हुनेछ।
नेमकिपा अध्यक्ष नारायणमान बिजुक्छेँ (रोहित) को नेतृत्वमा विसं २०३१ माघ १० गते पार्टीको स्थापना भएको थियो। पार्टीको पहिलो महाधिवेशन २०४७ सालमा भैरहवामा सम्पन्न भएको थियो। सातौँ महाधिवेशनसम्म बिजुक्छेँलाई नै सर्वसम्मत रूपमा अध्यक्ष चयन गर्दै आएको पार्टीले यसपटक पनि उहाँलाई नै अर्को कार्यकालका लागि चयन गर्नेछ वा नयाँ नेतृत्व आउनेछ भन्ने चासो उत्पन्न भएको छ।
यसअघिको सातौँ महाधिवेशनले बिजुक्छेको अध्यक्षतामा २५ सदस्यीय केन्द्रीय समिति चयन गरेको थियो, जसमा २३ केन्द्रीय सदस्य र दुई वैकल्पिक सदस्य थिए। आठौँ महाधिवेशनले पार्टीको भावी नेतृत्वबारे महत्वपूर्ण निर्णय गर्ने अपेक्षा गरिएको छ।
