काठमाडौं: भौतिक पूर्वाधार तथा यातायात मन्त्री देवेन्द्र दाहालले प्रधानमन्त्री कार्यालयले गर्ने कार्यसम्पादन मूल्यांकन प्रणाली सुधार गर्नुपर्ने बताएका छन्।
शुक्रबार सिंहदरबारमा बसेको विकास, आर्थिक मामिला तथा सुशासन समिति बैठकमा मन्त्री दाहालले आफ्नो मन्त्रालयको मूल्यांकन नतिजाप्रति असन्तुष्टि व्यक्त गरे। उनका अनुसार मन्त्रालयअन्तर्गत १९ आयोजनामध्ये ८ वटा सुरु हुन लागेका, ३ वटा सम्पन्न भइसकेका र ८ वटा कार्यान्वयनमै रहेको हुँदा प्रगति ५० प्रतिशतभन्दा माथि छ।
मन्त्री दाहालले ग्वार्को फ्लाइओभरको ८२ प्रतिशत काम पूरा भइसकेको र अब अन्तिम चरणमा पुगेको जानकारी दिए। साथै, विभिन्न राजमार्ग निर्माणका कामहरू पनि द्रुत गतिमा अघि बढिरहेको बताए।
उनका अनुसार यातायात नीति अन्तिम चरणमा पुगेको छ, र प्रदेश सरकारका सुझावका आधारमा आवश्यक कानूनी प्रक्रिया संसदमा लैजाने तयारी भइरहेको छ।
समितिले भौतिक पूर्वाधार तथा यातायात मन्त्रालय र मातहतका निकायहरूको अर्धवार्षिक पुँजीगत बजेट कार्यप्रगति सम्बन्धी छलफल गरेको थियो।
