अमेरिकाको क्यालिफोर्नियामा प्रथम गोल्डेन फिल्म अवार्ड समारोह हुँदै
क्यालिफोर्निया: अमेरिकाको सानफ्रान्सिस्को बे एरियामा नेपाली चलचित्रका हस्तिहरुको जमघट भएको छ। हिमालयन हबको आयोजना सम्पन्न हुन लागेको पहिलो पहिलो गोल्डेन नेपाली फिल्म अवार्ड रिच्मन्ड मेमोरियल अडिटोरियम, रिच्मन्ड क्यालिफोर्नियामा डिसेम्बर २१, २०२४ देखि सुरु हुनेछ।
सो समारोहमा विभिन्न फिल्महरूको प्रदर्शनकासाथ अवार्ड प्रदान गरिने कार्यक्रम रहेको छ। नेपाली फिल्मका भिष्मपिताको रूपमा परिचित वरिष्ठ कलाकार, निर्माता तथा निर्देशक नीर शाह, सुपर स्टार भुवन केसी, शिव श्रेष्ठ, अनमोल केसी, दीपाश्री, जितु नेपाललगायतको उपस्थिति भैसकेको छ।
उत्तर क्यालिफोर्नियाका अगुवाहरु उत्तम कार्की, मणि नेपाली पनेरु, यज्ञलाल श्रेष्ठ, नारायण सोमनामे, समाजसेवी युवाहरू सुजीत सिंह, रवी सिंह बस्नेत, विभिन्न संघ संस्थाका प्रतिनिधिहरू लगायतले उहाँहरूको स्वागत गरेका
थिए। नेपालबाट आएका कलाकारहरूसंग डिसेम्बर १९ मा यम्रीभिल हिल्टन होटेलमा आयोजना गरिएको भेटघाट कार्यक्रममा उल्लेख्य रुपमा जनसमुदायको उपस्थिति रहेको थियो। सो अवसरमा फिल्म स्टारहरूसँग फोटो खिचाउनेहरुको घुँइचो लागेको थियो। गोल्डेन नेपाली फिल्म अवार्ड यज्ञलाल श्रेष्ठ,रवी सिंह बस्नेत, नारायण सोमनामे तथा सुजित सिंहको सक्रियतामा आयोजना हुन लागेको हो। सो कार्यक्रमबारे विस्तृत जानकारीको लागि तलको फ्लाएरमा हेर्न सकिने छ।
हिमालयन ट्रिब्युन प्रतिनिधि
