रौतहट: रौतहटको सदरमुकाम गौरस्थित राइस मिलको बाटोमा प्रहरीले गस्तीका क्रममा स्रोत नखुलेको ६ लाख रुपैयाँसहित एक पैदल यात्रीलाई पक्राउ गरेको छ।
जिल्ला प्रहरी कार्यालयका अनुसार, बुधबार साँझ गौर नगरपालिका–१ निवासी ५४ वर्षीय वीरेन्द्र कुमार जयसवाल चेकजाँचको क्रममा पक्राउ परेका हुन्। जयसवालले लुकाइछिपाइ राखेको अवस्थामा ५ सय दरका २०० थान र १ हजार दरका ५०० थान नेपाली नोट गरी कुल ६ लाख रुपैयाँसहित १ थान मोबाइल फेला परेको जिल्ला प्रहरी प्रवक्ता डिएसपी दीपक कुमार रायले जानकारी दिनुभयो।
प्रहरीले बरामद रकमको स्रोत खुलाउन नसकेको भन्दै जयसवाललाई नियन्त्रणमा लिएको छ। रौतहट जिल्ला अदालतबाट म्याद थप गरी थप अनुसन्धान भइरहेको प्रहरीले जनाएको छ।
