भारत सरकारले मदर टेरेसाको पश्चिम वंगालस्थित मिसिनरिज अफ च्यारेटी (एमओसी) को बैंक अकाउन्ट बन्द गरेको छ । दक्षिणपन्थी हिन्दु समूहहरूले देशका विभिन्न स्थानमा क्रिसमसका कार्यक्रमहरूलाई बिथोलेको विवरण सार्वजनिक भइरहेका बेला एमओसीको अकाउन्ट बन्द गरिएको हो । हिन्दुवादी विशेष गरी मोदीको उत्तर प्रदेशस्थित मोदीको निर्वाचन क्षेत्रमा क्रिश्चियनविरुद्ध जाइलागेका छन् । आगामी फ्रेब्रुअरीमा उत्तर प्रदेशमा विधान सभा निर्वाचन हुँदैछ ।
दान दिने नाममा मिसिनरिज अफ च्यारेटीले धार्मिक कार्यक्रम सञ्चालन गरेर गरिब हिन्दु तथा अल्पसङ्ख्यक जनजातिलाई पैसा र निःशुल्क शिक्षा तथा आवास प्रदान गरेको भन्दै मोदीको भारतीय जनता पार्टी (भाजपा)ले च्यारेटीको विरोध गर्दै आएको छ ।
इजाजत नवीकरणका लागि च्यारेटीले गरेको निवेदन अस्वीकार गरिएको गृह मन्त्रालयले जनाएको छ । इजाजत नवीकरण नभए च्यारेटीले विदेशबाट कानुनी रूपमा रकम निकास गर्न सक्दैन । च्यारेटीको निवेदन नवीकरणलाई मनन गर्दा ‘प्रतिकूल परिणाम’ देखिएको मन्त्रालयले जनाएको छ । यसबारे मन्त्रालयले प्रस्ट रूपमा उल्लेख गरेको छैन ।
ममता बनर्जीकाे विराेध
मदर टेरेसाको मिसिनरिज अफ च्यारेटीको बैंक अकाउन्ट बन्दको खबरले आफू चकित परेको पश्चिम बंगालकी मुख्यमन्त्री ममता बनर्जीले बताएकी छिन् । ‘अकाउन्ट बन्द हुँदा २२ हजार बिरामी र कर्मचारी खाना र औषधीबाट वञ्चित भएका छन् । मानवीय प्रयत्नसँग कुनै पनि सम्झौता गर्न सकिदैन,’ मोदी सरकारको प्रमुख आलोचकसमेत रहेकी बनर्जीले ट्विट गरेकी छिन् ।
