काठमाडौं । कुवेतको कुवेतको रक्षा मन्त्रालय ले देशमा अमेरिकी लडाकू विमान दुर्घटनाग्रस्त भएको पुष्टि गरेको छ। सामाजिक सञ्जालमा सार्वजनिक भएको एक भिडियोमा लडाकू विमान आकाशबाट खसिरहेको दृश्य देखिएको छ।

मन्त्रालयका अनुसार दुर्घटनामा संलग्न सबै चालक दलका सदस्यहरू सुरक्षित रहेका छन्। एक पाइलटले समयमै इजेक्ट गरेर ज्यान जोगाएको प्रारम्भिक जानकारीमा उल्लेख छ। घटनाबारे थप विवरण आउन बाँकी रहेको छ।

अन्तर्राष्ट्रिय सञ्चारमाध्यम अल जजीरा ले घटनाको स्वतन्त्र पुष्टि तथा थप विवरण संकलन गर्ने प्रयास गरिरहेको जनाएको छ।

दुर्घटनापछि कुवेती सुरक्षाकर्मीहरूले तत्काल खोज तथा उद्धार अभियान सञ्चालन गरेका थिए। उद्धार गरिएका चालक दलका सदस्यलाई उपचारका लागि अस्पताल पुर्‍याइएको र उनीहरूको स्वास्थ्य अवस्था स्थिर रहेको रक्षा मन्त्रालयले जनाएको छ।

कुवेती अधिकारीहरू अमेरिकी पक्षसँग समन्वय गर्दै घटनाको कारणबारे अनुसन्धान गरिरहेका छन्। दुर्घटनाको यथार्थ कारणबारे औपचारिक प्रतिवेदन सार्वजनिक हुन बाँकी छ।

काठमाडौं । यही फागुन २१ गते हुने प्रतिनिधिसभा सदस्य निर्वाचनको प्रचारप्रसार आज राति १२ बजेदेखि पूर्ण रूपमा बन्द हुने भएको छ। निर्वाचन आयोग नेपाल ले मतदान मितिभन्दा ४८ घण्टा अघिदेखि ‘प्रचारप्रसार निषेध अवधि’ लागू हुने जनाएको छ।

आयोगका सहायक प्रवक्ता कुलबहादुर जिसीका अनुसार आज राति १२ बजेपछि कुनै पनि राजनीतिक दल, उम्मेदवार वा सम्बन्धित व्यक्तिले मत माग्ने, प्रचारप्रसार गर्ने वा निर्वाचनसँग सम्बन्धित सन्देश प्रवाह गर्न पाउने छैनन्। निर्वाचन आचारसंहिता, २०८२ मा यस अवधिमा पालना गर्नुपर्ने विशेष आचरण स्पष्ट रूपमा उल्लेख गरिएको छ।

गत फागुन ४ गतेदेखि सुरु भएको चुनावी प्रचार आज रातिसम्म जारी रहनेछ। त्यसपछि मतदातालाई स्वतन्त्र र निष्पक्ष रूपमा निर्णय गर्न वातावरण सिर्जना गर्न ‘मौन अवधि’ अनिवार्य गरिएको आयोगको भनाइ छ। यसले स्वच्छ र निष्पक्ष प्रतिस्पर्धालाई टेवा पुग्ने विश्वास गरिएको छ।

प्रचारप्रसारको अन्तिम दिन आज हिमाली तथा पहाडी जिल्लामा फागु पूर्णिमा पर्व परेकाले चाडपर्वसँगै चुनावी गतिविधि पनि देखिएको छ। निर्वाचनमा सहभागी दल तथा उम्मेदवारहरू आज अन्तिम प्रचार अभियानमा व्यस्त छन्।

प्रचारप्रसार निषेध अवधिमा राजनीतिक विज्ञापन, सामाजिक सञ्जालमा पोष्ट वा शेयर, अनलाइन तथा छापा माध्यममार्फत कुनै पनि प्रकारको चुनावी सन्देश प्रसारण गर्न पाइने छैन। साथै, मतदानस्थलको ३०० मिटर वरिपरि राखिएका दल वा उम्मेदवारका प्रचार सामग्री आज राति १२ बजेसम्म हटाइसक्नुपर्ने व्यवस्था गरिएको छ।

त्यस्तै, मतदान सुरु हुनुभन्दा तीन घण्टा अघिदेखि मतदान कार्य सम्पन्न नभएसम्म मतदाता, मतदान केन्द्रमा खटिएका कर्मचारी वा सुरक्षाकर्मीलाई कुनै प्रकारले अवरोध पुर्‍याउन नपाइने आचारसंहितामा उल्लेख छ।

आयोगले संविधानले दिएको अधिकारअनुसार निर्वाचनको सञ्चालन, रेखदेख, निर्देशन, नियन्त्रण र समन्वयसम्बन्धी सम्पूर्ण तयारी अन्तिम चरणमा पुगेको जनाएको छ। आचारसंहिताको इमान्दारीपूर्वक पालना भएमा निर्वाचनको निष्पक्षता र विश्वसनीयता थप मजबुत हुने आयोगको विश्वास छ।

काठमाडौं । इरानको इस्लामिक क्रान्तिकारी गार्ड कोर (IRGC) ले सोमबार इजरायली प्रधानमन्त्री बेन्जामिन नेतन्याहू को कार्यालय तथा इजरायली वायुसेना प्रमुखको मुख्यालयलाई लक्षित गरी क्षेप्यास्त्र आक्रमण गरेको दाबी गरेको छ।

इरानी समाचार एजेन्सी फार्स समाचार एजेन्सी मार्फत जारी विज्ञप्तिमा गार्डले “यहुदी शासनका अपराधी प्रधानमन्त्रीको कार्यालय र वायुसेना प्रमुखको मुख्यालय निशानामा पारिएको” उल्लेख गरेको छ।

गार्डको जनसम्पर्क विभागलाई उद्धृत गर्दै तस्नीम समाचार एजेन्सी ले खैबर नामक क्षेप्यास्त्र प्रयोग गरी “लक्षित तथा आकस्मिक आक्रमण” गरिएको जनाएको छ। विज्ञप्तिमा ती संरचनाहरू “गम्भीर रूपमा क्षतिग्रस्त” भएको दाबी गरिएको छ।

इरानले उक्त कारबाहीलाई शनिबार भएको संयुक्त अमेरिकी–इजरायली आक्रमणको प्रतिशोधस्वरूप गरिएको “दशौं चरण” को प्रतिक्रिया भएको बताएको छ। केही इरानी सञ्चारमाध्यमहरूले नेतन्याहूको अवस्थाबारे “अनिश्चितता” रहेको दाबी गरे पनि त्यसको स्वतन्त्र पुष्टि भने भएको छैन।

तेहरानले आफ्नो कदमलाई अन्तर्राष्ट्रिय कानुनअनुसार वैध आत्मरक्षाको अधिकारको प्रयोगका रूपमा व्याख्या गरेको छ। इरानी अधिकारीहरूले इजरायली भूभागसँगै खाडी क्षेत्रका अमेरिकी सैन्य अड्डाहरूलाई समेत सम्भावित लक्ष्य बनाइरहेको बताएका छन्।

यता, इजरायली पक्षले नेतन्याहूको कार्यालयमा आक्रमण भएको दाबीबारे कुनै आधिकारिक प्रतिक्रिया सार्वजनिक गरेको छैन। सामान्यतया, इजरायलले रणनीतिक तथा सरकारी संरचनासम्बन्धी क्षतिबारे सूचना सार्वजनिक गर्न कडा नियन्त्रण राख्ने गरेको छ।

हाल क्षेत्रीय तनाव तीव्र बन्दै गएको छ। इजरायल, इरान र खाडी मुलुकहरू वरपर अमेरिकी सैन्य संरचनामाथि क्षेप्यास्त्र तथा ड्रोन आक्रमणका घटनाहरू बढिरहेका छन्। इरान र उसका सहयोगी समूहहरूले कथित “आक्रामकता” अन्त्य नभएसम्म प्रतिकारात्मक कारबाही जारी रहने चेतावनी दिएका छन्।

तेहरान/जेरुसेलम – इजराइल, अमेरिका र इरानबीच जारी सैन्य द्वन्द्व तेस्रो दिनमा प्रवेशसँगै मध्यपूर्व क्षेत्रको सुरक्षा अवस्था थप जटिल बन्दै गएको छ। क्षेत्रीय शक्ति सन्तुलन र विश्व ऊर्जा आपूर्तिमा यसको प्रभाव पर्ने आकलन गरिएको छ।

यसैबीच इरानले साउदी अरबको महत्वपूर्ण ‘रास तनुरा’ तेल रिफाइनरीमा आक्रमण गरेको खबर सार्वजनिक भएको छ। साउदीको सरकारी तेल कम्पनी Saudi Aramcoअन्तर्गत सञ्चालनमा रहेको उक्त रिफाइनरी हमलापछि बन्द गरिएको अन्तर्राष्ट्रिय समाचार स्रोतहरूले जनाएका छन्। दैनिक करिब ५.५ देखि ६ लाख ब्यारेल कच्चा तेल प्रशोधन क्षमता रहेको यो संरचना विश्वकै प्रमुख अपतटीय तेल लोडिङ टर्मिनलमध्ये एक मानिन्छ। यहाँबाट अमेरिका, एसिया र युरोपलगायतका देशहरूमा तेल निर्यात हुँदै आएको छ।

इरानका शीर्ष राष्ट्रिय सुरक्षा अधिकारी अली लारीजानीले अमेरिकासँग कुनै वार्ता नगर्ने स्पष्ट पारेका छन्। उनले इरानले अमेरिकासँग पुनः वार्ता सुरु गर्ने प्रयास गरेको भन्ने समाचारलाई अस्वीकार गरेका छन्।

त्यसैगरी, इरानले इजराइलबाहेक कतार, बहराइन र संयुक्त अरब इमिरेट्समा पनि आक्रमण पुनः सुरु गरेको दाबी गरिएको छ। अर्कोतर्फ, लेबनानस्थित सशस्त्र समूह Hezbollah पनि द्वन्द्वमा सहभागी भएको बताइएको छ। इरानको समर्थनप्राप्त हिजबुल्लाहले इजराइलका विभिन्न स्थानमा आक्रमण गरेको र प्रतिशोध लिने घोषणा गरेको खबर आएको छ।

अन्तर्राष्ट्रिय सञ्चारमाध्यमका अनुसार अमेरिका र इजराइलले संयुक्त रूपमा इरानका सयौँ स्थानमा हमला गरेका छन्। प्रारम्भिक ३० घण्टामै हजारौँ बम खसालिएको दाबी गरिएको छ। यी हमलामा हालसम्म २०० भन्दा बढी व्यक्तिको मृत्यु तथा ७४० भन्दा बढी घाइते भएको जानकारी सार्वजनिक गरिएको छ।

एक विद्यालयमा मिसाइल खस्दा ठूलो मानवीय क्षति भएको समाचार पनि बाहिरिएको छ। यद्यपि, उपलब्ध विवरणहरूको स्वतन्त्र पुष्टि भने हुन बाँकी रहेको बताइएको छ।

फेब्रुअरी २८ देखि सुरु भएको भनिएको यस द्वन्द्वको पहिलो दिन नै इरानका सर्वोच्च नेता Ali Khamenei मारिएको दाबी गरिए पनि त्यसबारे आधिकारिक पुष्टि स्पष्ट रूपमा सार्वजनिक भएको छैन। साथै, आइतबार तीन अमेरिकी सैनिकको मृत्यु भएको समाचार पनि आएको छ।

समग्र घटनाक्रमले मध्यपूर्व मात्र नभई विश्व राजनीतिमा पनि गम्भीर प्रभाव पार्ने देखिएको छ। विश्व समुदायले परिस्थितिलाई नजिकबाट नियालिरहेको छ।

सर्लाही – प्रतिनिधिसभा निर्वाचन नजिकिँदै गर्दा सर्लाही–४ यसपटक राष्ट्रिय राजनीतिको केन्द्रबिन्दु बनेको छ। गगन थापा आफ्नो निर्वाचन क्षेत्र काठमाडौं–४ छाडेर मधेश झरेपछि यहाँको चुनावी समीकरण थप रोचक बनेको हो।

नेपाली कांग्रेसका सभापति थापा आमसभा र घरदैलो अभियानमा सक्रिय छन्। जेन–जी आन्दोलनपछि पार्टी रुपान्तरणको एजेन्डासहित विशेष महाधिवेशनमार्फत नेतृत्वमा पुगेका थापाले मधेशमा उम्मेदवारी दिएपछि सिंगो देशको ध्यान सर्लाही–४ मा केन्द्रित भएको छ। यद्यपि, स्थानीय भाषा र सामाजिक परिवेशसँगको सामञ्जस्य उनको लागि प्रारम्भिक चुनौती बनेको विश्लेषण गरिन्छ।

यस क्षेत्रमा थापा पूर्व विजेता अमरेश कुमार सिंहसँग प्रतिस्पर्धामा छन्। हाल राष्ट्रिय स्वतन्त्र पार्टी (रास्वपा)बाट उम्मेदवार बनेका सिंह २०७०, २०७४ र २०७९ मा लगातार तीनपटक निर्वाचित भइसकेका छन्। २०७९ मा स्वतन्त्र उम्मेदवारका रूपमा २०,०१७ मत ल्याएर जितेका सिंह यसपटक पार्टी संगठनसहित मैदानमा उत्रिएका छन्।

त्यसैगरी, नेपाल कम्युनिष्ट पार्टी (एमाले)बाट अमनिशकुमार यादव उम्मेदवार बनेपछि समीकरण झन् जटिल भएको छ। उनका पिता शिवपूजन राय यादवलाई यस क्षेत्रमा प्रभावशाली ‘भोट बैंक’ भएका नेताका रूपमा हेरिन्छ। स्थानीय तहमा उनको प्रभाव अझै कायम रहेको चर्चा छ।

सर्लाही–४ मा धनकौल, रामनगर, बलरा, विष्णु, बसबरिया गाउँपालिका तथा बरहथवा नगरपालिकाका केही वडासहित कुल ५१ वडा समेटिएका छन्। करिब १ लाख २५ हजार मतदाता रहेको यस क्षेत्रमा स्थानीय तह निर्वाचनपछि विभिन्न दलका वडाध्यक्ष तथा कार्यकर्ता कांग्रेस प्रवेश गरेका कारण थापाको संगठनात्मक आधार बलियो बनेको दाबी गरिएको छ।

२०७९ को स्थानीय निर्वाचनमा विष्णु गाउँपालिकाका अध्यक्ष कांग्रेसबाट निर्वाचित भएका थिए भने अन्य स्थानीय तहमा विभिन्न दलका प्रतिनिधि रहेका छन्। बलरा नगरपालिकाका ११ वडामध्ये ६ वडाध्यक्ष कांग्रेसका हुनु र केही अन्य दलका निर्वाचित जनप्रतिनिधि पार्टी प्रवेश गर्नुले कांग्रेसलाई उत्साहित बनाएको छ।

उपसभापति विश्वप्रकाश शर्माले थापाको उम्मेदवारीलाई मधेशप्रतिको सम्मानका रूपमा व्याख्या गर्दै यसलाई राष्ट्रिय महत्वको निर्णय बताएका छन्। उनका अनुसार मधेशबाट नेतृत्व स्थापित गर्नु कांग्रेसको रणनीतिक सन्देश पनि हो।

सर्लाही–४ ऐतिहासिक रूपमा कांग्रेसको गढ मानिँदै आएको क्षेत्र हो। २०४८ देखि २०५६ सम्म महन्थ ठाकुरले यहाँबाट विजय हासिल गरेका थिए। पछिल्ला तीन निर्वाचनमा काठमाडौं–४ बाट विजयी हुँदै आएका थापाको मधेश प्रवेशलाई राजनीतिक ‘टेस्ट केस’का रूपमा हेरिएको छ।

त्रिकोणीय प्रतिस्पर्धा, स्थानीय प्रभावशाली नेताहरूको भूमिका र पार्टी प्रवेशको लहरले सर्लाही–४ यसपटकको सबैभन्दा चासोको निर्वाचन क्षेत्रमध्ये एक बनेको छ। अन्तिम परिणाम जे भए पनि यहाँको चुनावले राष्ट्रिय राजनीतिमा दूरगामी सन्देश दिने निश्चित देखिएको छ।

वीरगञ्ज – वीरगञ्ज महानगरपालिका–२४ रामगढवा स्थित एक उद्योगमा मेसिनमा च्यापिएर एक मजदुरको मृत्यु भएको छ। पर्सागढी नगरपालिका–५ हर्दियाका अन्दाजी २६/२७ वर्षीय विरेन्द्र पण्डितको ज्यान गएको हो।

महेश शर्माले सञ्चालन गरेको ‘एक्स पिएम’ उद्योगमा साँझ काम गर्ने क्रममा मेसिनले च्यापिएर उनको मृत्यु भएको बताइएको छ।

जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार घटनाबारे अनुसन्धान भइरहेको छ। “काम गर्ने क्रममा मजदुरको मृत्यु भएको जानकारी आएको छ। अनुसन्धानका लागि वडा प्रहरी कार्यालय श्रीपुरबाट टोली खटिएको छ,” उनले बताए।

घटनापछि मृतकका आफन्त र गाउँले आइतबार साँझ उद्योग परिसरमा पुगेका थिए। उनीहरूले घटना शंकास्पद भएको दाबी गर्दै उद्योगका सञ्चालक उपस्थित भएपछि मात्र अन्य कानुनी प्रक्रिया अघि बढाउनुपर्ने माग गरेका छन्।

पर्सागढी नगरपालिका–५ का वडा अध्यक्ष नितेश मिश्रले घटनाको वास्तविकता बुझ्न कम्पनीका मालिकको प्रतीक्षामा रहेको बताए। उनका अनुसार काम गरिरहेको सिसिटिभी फुटेज र प्रहरी उद्योगमा पुगेको फुटेज उपलब्ध भए पनि घटना भएको क्षणको फुटेज नरहेको पाइएको छ। “घटना शंकास्पद देखिएको छ, कम्पनीका मालिक सम्पर्कमा आएका छैनन्,” उनले भने।

प्रहरीका अनुसार अनुसन्धानपछि घटनाबारे यथार्थ विवरण सार्वजनिक गरिनेछ।

काठमाडौँ, फागुन १८ । नेपाल राष्ट्र बैङ्कले आजका लागि विदेशी मुद्राको विनिमयदर निर्धारण गरेको छ। निर्धारणअनुसार अमेरिकी डलर एकको खरिददर १४५ रुपैयाँ २७ पैसा र बिक्रीदर १४५ रुपैयाँ ८७ पैसा तोकिएको छ।

त्यसैगरी युरो एकको खरिददर १७१ रुपैयाँ ६२ पैसा र बिक्रीदर १७२ रुपैयाँ ३३ पैसा, युके पाउन्ड स्टर्लिङ एकको खरिददर १९५ रुपैयाँ ९० पैसा र बिक्रीदर १९६ रुपैयाँ ७१ पैसा, स्विस फ्र्याङ्क एकको खरिददर १८८ रुपैयाँ ९४ पैसा र बिक्रीदर १८९ रुपैयाँ ७२ पैसा कायम गरिएको छ।

अष्ट्रेलियन डलर एकको खरिददर १०३ रुपैयाँ ३७ पैसा र बिक्रीदर १०३ रुपैयाँ ८० पैसा, क्यानेडियन डलर एकको खरिददर १०६ रुपैयाँ ४७ पैसा र बिक्रीदर १०६ रुपैयाँ ९१ पैसा, सिङ्गापुर डलर एकको खरिददर ११४ रुपैयाँ ८४ पैसा र बिक्रीदर ११५ रुपैयाँ ३१ पैसा तोकिएको छ।

जापानी येन १० को खरिददर ९ रुपैयाँ ३१ पैसा र बिक्रीदर ९ रुपैयाँ ३५ पैसा, चिनियाँ युआन एकको खरिददर २१ रुपैयाँ १८ पैसा र बिक्रीदर २१ रुपैयाँ २७ पैसा, साउदी रियाल एकको खरिददर ३८ रुपैयाँ ७३ पैसा र बिक्रीदर ३८ रुपैयाँ ८९ पैसा, कतारी रियाल एकको खरिददर ३९ रुपैयाँ ८५ पैसा र बिक्रीदर ४० रुपैयाँ ०२ पैसा कायम भएको छ।

केन्द्रीय बैङ्कका अनुसार थाई भाट एकको खरिददर ४ रुपैयाँ ६८ पैसा र बिक्रीदर ४ रुपैयाँ ७० पैसा, युएई दिराम एकको खरिददर ३९ रुपैयाँ ५५ पैसा र बिक्रीदर ३९ रुपैयाँ ७१ पैसा, मलेसियन रिङ्गेट एकको खरिददर ३७ रुपैयाँ ३३ पैसा र बिक्रीदर ३७ रुपैयाँ ४९ पैसा, साउथ कोरियन वन १०० को खरिददर १० रुपैयाँ ०९ पैसा र बिक्रीदर १० रुपैयाँ १३ पैसा, स्विडिस क्रोनर एकको खरिददर १६ रुपैयाँ ०९ पैसा र बिक्रीदर १६ रुपैयाँ १५ पैसा, डेनिस क्रोनर एकको खरिददर २२ रुपैयाँ ९७ पैसा र बिक्रीदर २३ रुपैयाँ ०६ पैसा तोकिएको छ।

राष्ट्र बैङ्कले हङकङ डलर एकको खरिददर १८ रुपैयाँ ५७ पैसा र बिक्रीदर १८ रुपैयाँ ६५ पैसा, कुवेती दिनार एकको खरिददर ४७५ रुपैयाँ ५२ पैसा र बिक्रीदर ४७७ रुपैयाँ ४८ पैसा, बहराइन दिनार एकको खरिददर ३८५ रुपैयाँ २९ पैसा र बिक्रीदर ३८६ रुपैयाँ ८८ पैसा, ओमनी रियाल एकको खरिददर ३७७ रुपैयाँ ८२ पैसा र बिक्रीदर ३७९ रुपैयाँ ३८ पैसा रहेको छ।

यस्तै, भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा तोकिएको छ।

राष्ट्र बैङ्कले यो विनिमयदर आवश्यक अनुसार जुनसुकै समयमा संशोधन गर्न सक्ने जनाएको छ। वाणिज्य बैङ्कले तोक्ने विनिमयदर फरक हुनसक्ने र अद्यावधिक विनिमयदर बैङ्कको वेबसाइटमा उपलब्ध हुने जनाइएको छ।

काठमाडौं – हाल देशभर पश्चिमी वायुको आंशिक प्रभाव रहेको मौसम पूर्वानुमान महाशाखाले जनाएको छ। महाशाखाका अनुसार आज दिउँसो तराईका केही स्थानमा बिहानको समयमा हुस्सु लाग्ने सम्भावना छ।

कोशी, बागमती र गण्डकी प्रदेशका हिमाली भू–भागमा सामान्यतया बदली रहनेछ भने ती प्रदेशका पहाडी क्षेत्रसहित अन्य हिमाली भू–भागमा आंशिक बदली रहने अनुमान गरिएको छ। बाँकी भू–भागमा मौसम मुख्यतया सफा रहनेछ।

महाशाखाका अनुसार कोशी प्रदेशको पहाडी तथा हिमाली भू–भाग र बागमती तथा गण्डकी प्रदेशका हिमाली क्षेत्रका एक–दुई स्थानमा मेघगर्जन तथा चट्याङ्गसहित हल्का वर्षा वा हिमपात हुन सक्ने सम्भावना छ।

आज राति तराईका थोरै स्थानमा तुँवालो लाग्ने अनुमान छ। कोशी र गण्डकी प्रदेशका पहाडी तथा हिमाली क्षेत्रमा आंशिक बदली रहनेछ भने अन्य स्थानमा मौसम मुख्यतया सफा रहनेछ। साथै, कोशी प्रदेशको पहाडी तथा हिमाली क्षेत्र र गण्डकी प्रदेशको हिमाली भू–भागका एक–दुई स्थानमा मेघगर्जनसहित हल्का वर्षा वा हिमपात हुन सक्ने महाशाखाले जनाएको छ।

काठमाडौँ – प्रतिनिधिसभा निर्वाचन नजिकिँदै जाँदा काठमाडौँ निर्वाचन क्षेत्र नम्बर २ को प्रतिस्पर्धा झनै रोचक बन्दै गएको छ। राष्ट्रिय प्रजातन्त्र पार्टी (राप्रपा) को एकता महाधिवेशनमा सर्वाधिक मत ल्याएर केन्द्रीय सदस्य बनेकी युवा उद्यमी कुन्ती पोखरेल यस क्षेत्रमा चर्चामा रहेकी उम्मेदवार हुन्।

एक दशकभन्दा बढी समयदेखि राप्रपाको राजनीतिमा सक्रिय पोखरेल राजनीतिसँगै व्यवसाय र सामाजिक क्षेत्रमा समेत परिचित नामका रूपमा चिनिन्छिन्। महिला हिंसाविरुद्धका अभियान र राष्ट्रिय गैरसरकारी संस्था समन्वय विभागको नेतृत्वमार्फत उनले गरेको कार्यले स्थानीय तहमा उनको उपस्थिति मजबुत बनाएको समर्थकहरूको दाबी छ।

उनको चुनावी अभियानमा देखिएको सक्रियता र घरदैलो कार्यक्रमका क्रममा पाएको प्रतिक्रियाले क्षेत्रको प्रतिस्पर्धालाई थप चासोको विषय बनाएको छ। स्थापित नेताहरूलाई चुनौती दिने उनको अभियानले परिवर्तन खोजिरहेका मतदातालाई आकर्षित गरेको विश्लेषण गरिएको छ।

पटक–पटक चुनाव जितेर पनि विकासमा अपेक्षित योगदान नगरेको आरोप लाग्दै आएका उम्मेदवारप्रति असन्तुष्टि रहेको जनमतलाई लक्षित गर्दै पोखरेलले “सेवामुखी राजनीति” को नारालाई अघि सारेकी छन्। राजनीतिलाई पेशा नभई समाजसेवा मान्ने उनको अभिव्यक्तिले मतदातामाझ विश्वास बढेको समर्थकहरू बताउँछन्।

राप्रपाको ‘हिन्दू राष्ट्र’ र ‘राजसंस्था’ पुनर्स्थापनाको एजेन्डासहित मैदानमा उत्रिएकी पोखरेलले धर्म, संस्कृति र विकासलाई जोडेर आफ्नो भिजन प्रस्तुत गरिरहेकी छन्। यसले युवा तथा पाका दुवै पुस्तामा बहस सिर्जना गरेको देखिन्छ।

निर्वाचन मिति नजिकिँदै जाँदा काठमाडौँ–२ मा प्रतिस्पर्धा कसिलो बन्दै गएको छ। मतदाताको अन्तिम निर्णय जे भए पनि यसपटकको चुनावले यस क्षेत्रमा नयाँ र वैकल्पिक राजनीतिक शक्ति उदाउने संकेत दिएको छ।

ओखलढुङ्गा – प्रतिनिधिसभा निर्वाचन नजिकिँदै जाँदा ओखलढुङ्गामा अस्मिता थापाको पक्षमा उल्लेखनीय जनसमर्थन देखिएको छ। नेपाल कम्युनिष्ट पार्टी (एमाले)ले जिल्लाको इतिहासमै पहिलोपटक प्रमुख उम्मेदवारका रूपमा महिलालाई अघि सारेपछि स्थानीय तहमा नयाँ उत्साह र चासो बढेको छ। “आफ्नै छोरी–चेली”लाई जिताउनुपर्छ भन्ने भावनाले विशेषगरी महिला मतदाता र युवावर्ग सक्रिय देखिएका छन्।

विगतको निर्वाचन परिणामअनुसार २५ हजार २४५ मतसहित एमाले जिल्लामा पहिलो शक्तिका रूपमा रहेको छ। यसपटक पार्टीभित्र देखिएको एकता, संगठनको सक्रियता र नयाँ मतदाताको आकर्षणले चुनावी समीकरण थप रोचक बनेको विश्लेषण गरिएको छ। केही नेताको बहिर्गमन भए पनि निष्क्रिय कार्यकर्ताको पुनःसक्रियता र स्वतन्त्र मतदाताको झुकावले त्यसको असर न्यून हुने दाबी पार्टी वृत्तमा गरिएको छ।

उम्मेदवार थापाले व्यक्तिगत आलोचना र आरोप–प्रत्यारोपभन्दा विकास, सुशासन र समावेशी नेतृत्वलाई प्राथमिकतामा राख्दै चुनावी अभियान अघि बढाएकी छन्। यसले अनिर्णित मतदातासमेत प्रभावित भएको स्थानीय विश्लेषकहरूको भनाइ छ। विशेषगरी सिद्धिचरण, मोलुङ, लिखु र चम्पादेवी क्षेत्रमा एमालेको प्रभाव बलियो देखिएको बताइन्छ।

निर्वाचनको अन्तिम चरणमा देखिएको जनउत्साहले ओखलढुङ्गाको राजनीतिक वातावरणमा नयाँ तरंग सिर्जना गरेको छ। परिणाम के आउँछ भन्ने अन्तिम निर्णय मतदाताको हातमा भए पनि यसपटकको चुनावले जिल्लामा महिलाको नेतृत्वबारे सकारात्मक बहस सुरु गराएको छ।