काठमाडौँ: हाल नेपालमा कुनै उल्लेखनीय मौसम प्रणालीको प्रभाव छैन। जल तथा मौसम विज्ञान विभागका अनुसार देशका पहाडी भूभागमा आंशिक बदली रही बाँकी क्षेत्रमा मौसम सामान्यतया सफा रहनेछ।

आज दिउँसो कोशी, बागमती र गण्डकी प्रदेशका पहाडी क्षेत्रमा आंशिक बदली रहनेछ भने अन्य ठाउँको मौसम सफा रहनेछ। राति कोशी र गण्डकी प्रदेशका केही पहाडी क्षेत्रमा आंशिक बदली भए पनि बाँकी भूभाग खुला रहनेछ।

विभागका अनुसार आगामी २४ घण्टामा देशभर कतै पनि वर्षा वा हिमपातको सम्भावना छैन। साथै, विभागले मौसमसम्बन्धी अद्यावधिक जानकारी लिएर मात्र योजना बनाउन अनुरोध गरेको छ।

इस्लामावाद: पाकिस्तानको उत्तरपश्चिमी खैबर पख्तुनख्वा प्रान्तमा सुरक्षा बलहरूसँगको भीडन्तमा ६ जना आतंककारी मारिएको पाकिस्तानी सेनाले जनाएको छ।

पाकिस्तानी सेनाको मिडिया शाखा इन्टर–सर्भिसेस पब्लिक रिलेसन्स (आईएसपीआर) का अनुसार सुरक्षा बलहरूले उत्तरी वजिरिस्तान जिल्लामा आतंककारीहरूको उपस्थितिको सुराकी पाएपछि गुप्तचरमा आधारित अपरेशन सञ्चालन गरेका थिए।

सुरक्षा अपरेशनका क्रममा आतंककारीहरूले गोली चलाएपछि दोहोरो भिडन्त भएको र त्यसक्रममा ६ जना आतंककारी मारिएको आईएसपीआरले विज्ञप्तिमार्फत जानकारी दिएको छ।

हतियारसहित आतंककारीको समूह नष्ट

मारिएका आतंककारीहरूबाट ठूलो मात्रामा हतियार र गोलाबारुद बरामद गरिएको छ। आईएसपीआरका अनुसार ती आतंककारीहरू सुरक्षा बलहरूसँगको भिडन्तका साथै सर्वसाधारणको हत्या तथा विभिन्न आतंकवादी गतिविधिमा संलग्न थिए।

सेनाले उत्तरी वजिरिस्तानका अन्य भागहरूमा पनि आतंककारीहरूको उपस्थिति रहेको आशङ्का गर्दै थप अपरेशन जारी राख्ने जनाएको छ। आईएसपीआरले स्थानीय जनतालाई सुरक्षाका उपायहरू अवलम्बन गर्न आग्रह गर्दै आतंकवाद विरुद्धको संघर्षमा सेना प्रतिबद्ध रहेको बताएको छ।

उत्तरी वजिरिस्तान पाकिस्तानमा लामो समयदेखि आतंकवादी समूहहरूको आश्रयस्थल मानिँदै आएको छ। पछिल्लो समय पाकिस्तानी तालिबान (टीटीपी) लगायतका विद्रोही समूहहरूले सुरक्षा बलहरूमाथि आक्रमण बढाएका छन्, जसका कारण सेनाले आक्रमक अपरेशन अघि बढाएको हो।

सिरहा: नेपाल कम्युनिष्ट पार्टी (माओवादी केन्द्र) का अध्यक्ष तथा प्रधानमन्त्री पुष्पकमल दाहाल ‘प्रचण्ड’ले संविधान संशोधनको नाममा जनताको अधिकार संकुचित गर्ने प्रयास भइरहेको आरोप लगाएका छन्।

तराई–मधेस जनजागरण अभियान अन्तर्गत सिरहाको सदरमुकाममा आयोजित जनसभालाई सम्बोधन गर्दै उनले दशवर्षे जनयुद्ध र जनआन्दोलनबाट प्राप्त संविधान उल्टाउने कुनै पनि प्रयास सफल हुन नदिइने बताए।

“अहिले सरकारमा रहेका दलहरू नै संविधान संशोधनको बहानामा दुई दलीय व्यवस्था लाद्ने षड्यन्त्र गरिरहेका छन्। जनताको बलिदानबाट प्राप्त संविधान उल्टाउने खेल हामी कुनै पनि हालतमा सफल हुन दिन्नौँ,” प्रचण्डले भने।

मधेसी समुदायप्रति प्रतिबद्धता दोहोर्याउँदै हुलाकी अभियान

प्रधानमन्त्री दाहालले विगतका कमजोरी सच्याउँदै मधेसी समुदायसँग पुनः गहिरो सम्बन्ध स्थापित गर्न माओवादी केन्द्रले ‘हुलाकी अभियान’ सुरु गरेको बताए।

उनले जनयुद्धकै क्रममा मधेसी जनताको अधिकार स्थापित गर्न मधेस सरकार गठन तथा पार्टीभित्र मधेसी राष्ट्रिय मुक्ति मोर्चा स्थापना गरिएको स्मरण गराउँदै आफ्नो पार्टी मधेसी समुदायको आत्मसम्मान र हकहितका लागि सधैं प्रतिबद्ध रहेको उल्लेख गरे।

हुलाकी राजमार्ग पुनःनिर्माणमा जोड

पूर्वप्रधानमन्त्री दाहालले जीर्ण अवस्थामा रहेको हुलाकी राजमार्ग पुनःनिर्माणको विषयमा पनि चर्चा गर्दै आफू पहिलो पटक प्रधानमन्त्री रहँदा भारतसँग समझदारी गरी निर्माण प्रक्रिया अघि बढाएको जिकिर गरे।

उनले चोहर्वा–सिरहा, सिरहा–कल्याणपुर–मिर्चैया सडक निर्माण तथा माडर भन्सार स्तरोन्नतिका लागि आफ्नो निरन्तर पहल रहने प्रतिबद्धता व्यक्त गरे।

“सिरहा र धनुषा जोड्ने कमला नदीको भत्किएको पुलको पुनर्निर्माण प्रक्रियालाई तीव्रता दिन हामीले आवश्यक पहल गर्नेछौँ,” उनले भने।

अन्य नेताहरूको सम्बोधन

कार्यक्रममा नेपाल समाजवादी पार्टीका अध्यक्ष महेन्द्र राय यादव, माओवादी केन्द्रका उपमहासचिव मातृकाप्रसाद यादव, स्थायी समिति सदस्य विश्वनाथ साहलगायत नेताहरूले सम्बोधन गरे।

कार्यक्रम जिल्ला इन्चार्ज अजयशंकर नायकको अध्यक्षतामा सम्पन्न भएको थियो भने सञ्चालन केन्द्रीय सदस्य जगतप्रसाद यादवले गरेका थिए।

काठमाडौँ: नेपाल राष्ट्र बैङ्कले आजका लागि विदेशी मुद्राको विनिमयदर निर्धारण गरेको छ । आजका लागि निर्धारण गरिएको दरअनुसार, अमेरिकी डलरको मूल्य बढेर हालसम्मकै उच्च बिन्दुमा पुगेको छ । केन्द्रीय बैङ्कका अनुसार आज अमेरिकी डलर एकको खरिददर १३९ रूपैयाँ ७० पैसा र बिक्रीदर १४० रूपैयाँ ३० पैसा कायम भएको छ ।

आजका लागि युरोपियन युरो एकको खरिददर १४५ रूपैयाँ २४ पैसा र बिक्रीदर १४५ रूपैयाँ ८६ पैसा, युके पाउन्ड स्ट्रलिङ एकको खरिददर १७५ रूपैयाँ ८४ पैसा र बिक्रीदर १७६ रूपैयाँ ६० पैसा, स्विस फ्र्याङ्क एकको खरिददर १५४ रूपैयाँ ७३ पैसा र बिक्रीदर १५५ रूपैयाँ ४० पैसा कायम गरिएको छ ।

यसैगरी, अष्ट्रेलियन डलर एकको खरिददर ८६ रूपैयाँ ८२ पैसा र बिक्रीदर ८७ रूपैयाँ २० पैसा, क्यानेडियन डलर एकको खरिददर ९६ रूपैयाँ ७८ पैसा र बिक्रीदर ९७ रूपैयाँ १९ पैसा, सिङ्गापुर डलर एकको खरिददर १०३ रूपैयाँ ६० पैसा र बिक्रीदर १०४ रूपैयाँ ०४ पैसा निर्धारण गरिएको छ ।

जापानी येन १० को खरिददर नौ रूपैयाँ २९ पैसा र बिक्रीदर नौ रूपैयाँ ३३ पैसा, चिनियाँ युआन एकको खरिददर १९ रूपैयाँ १९ पैसा र बिक्रीदर १९ रूपैयाँ २७ पैसा, साउदी अरेबियन रियाल एकको खरिददर ३७ रूपैयाँ २५ पैसा र बिक्रीदर ३७ रूपैयाँ ४१ पैसा, कतारी रियाल एकको खरिददर ३८ रूपैयाँ ३३ पैसा र बिक्रीदर ३८ रूपैयाँ ५० पैसा कायम भएको बैङ्कले जनाएको छ ।

यस्तै, थाई भाट एकको खरिददर चार रूपैयाँ ०९ पैसा र बिक्रीदर चार रूपैयाँ ११ पैसा, युएई दिराम एकको खरिददर ३८ रूपैयाँ ०४ पैसा र बिक्रीदर ३८ रूपैयाँ २० पैसा, मलेसियन रिङ्गेट एकको खरिददर ३१ रूपैयाँ ३१ पैसा र बिक्रीदर ३१ रूपैयाँ ४४ पैसा, साउथ कोरियन वन एक सयको खरिददर नौ रूपैयाँ ५७ पैसा र बिक्रीदर नौ रूपैयाँ ६१ पैसा, स्विडिस क्रोनर एकको खरिददर १२ रूपैयाँ ९८ पैसा र बिक्रीदर १३ रूपैयाँ ०४ पैसा र डेनिस क्रोनर एकको खरिददर १९ रूपैयाँ ४७ पैसा र बिक्रीदर १९ रूपैयाँ ५६ पैसा तोकिएको
छ ।

राष्ट्र बैङ्कले हङकङ डलर एकको खरिददर १७ रूपैयाँ ९६ पैसा र बिक्रीदर १८ रूपैयाँ ०४ पैसा, कुवेती दिनार एकको खरिददर ४५२ रूपैयाँ ३५ पैसा र बिक्रीदर ४५४ रूपैयाँ ३० पैसा, बहराइन दिनार एकको खरिददर ३७० रूपैयाँ ६६ पैसा र बिक्रीदर ३७२ रूपैयाँ २५ पैसा, ओमनी रियाल एकको खरिददर ३६२ रूपैयाँ ८६ पैसा र बिक्रीदर ३६४ रूपैयाँ ४२ पैसा निर्धारण गरेको छ । त्यस्तै, भारतीय रूपैयाँ एक सयको खरिददर १६० रूपैयाँ र बिक्रीदर १६० रूपैयाँ १५ पैसा तोकेको छ ।

राष्ट्र बैङ्कले यो विनिमयदरलाई आवश्यकतानुसार जुनसुकै समयमा पनि संशोधन गर्न सकिने जनाएको छ । वाणिज्य बैङ्कले तोक्ने विनिमयदर भने फरक हुनसक्ने र अद्यावधिक विनिमयदर केन्द्रीय बैङ्कको वेबसाइटमा उपलब्ध हुने जनाइएको छ ।

काठमाडौँ: राष्ट्रिय स्वतन्त्र पार्टी (रास्वपा) ले काठमाडौँ जिल्लाको अधिवेशनबाट निर्वाचित पदाधिकारी तथा सदस्यलाई शपथ गराएको छ।

वनस्थलीस्थित पार्टी कार्यालयमा आयोजित ‘सपथ ग्रहण’ कार्यक्रममा काठमाडौँका ४१ वडाको अधिवेशनबाट निर्वाचित २९५ जना पदाधिकारी तथा सदस्यहरूले शपथ लिएका छन्। रास्वपा काठमाडौँ जिल्ला सभापति प्रदीप विष्टले उनीहरूलाई सामूहिक शपथ गराउनुभयो।

शपथपछि कार्यवाहक सभापति डोलप्रसाद अर्यालले निर्वाचित सबैलाई आफ्नो जिम्मेवारीमा केन्द्रित भएर काम गर्न निर्देशन दिनुभयो। कार्यवाहक महामन्त्री कवीन्द्र बुर्लाकोटीले वडा समितिलाई वडास्तरमा प्रशिक्षण कार्यक्रम सञ्चालन गर्ने, स्थानीय विकास योजनाहरू अघि बढाउने र वडाका गतिविधिहरूको अनुगमन गर्ने जिम्मेवारीबारे जोड दिनुभयो। साथै, उहाँले वडा पदाधिकारी तथा सदस्यहरूलाई जनताको दुःख-सुखको सारथी बन्न आग्रह गर्नुभयो।

संसदीय दलका उपनेता एवं सांसद विराजभक्त श्रेष्ठले आगामी निर्वाचनमा रास्वपालाई पहिलो पार्टी बनाउन कटिबद्ध भएर काम गर्न निर्देशन दिनुभयो। शपथ ग्रहण कार्यक्रममा कार्यवाहक सभापति अर्याल, कार्यवाहक महामन्त्री बुर्लाकोटी, संसदीय दलका उपनेता श्रेष्ठसहित केन्द्रीय सदस्य तथा सांसदहरूको उपस्थिति रहेको थियो।