विराटनगर: नेपाल कम्युनिष्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले संघीय लोकतान्त्रिक गणतन्त्रात्मक संविधान संशोधनका लागि उपयुक्त समय आएको बताएका छन्।

पूर्वेली जनसञ्चार सहकारी संस्था लिमिटेडद्वारा प्रकाशित ‘हाम्रो मत राष्ट्रिय दैनिक’को २२औं वार्षिकोत्सव समारोहको शनिबार उद्घाटन गर्दै अध्यक्ष दाहालले संविधान परिमार्जन र संशोधनका लागि गम्भीर छलफल आवश्यक रहेको बताए। संविधान संशोधनबारे सरकारले पहल गर्नुपर्ने उनको भनाइ थियो।

उनले शासकीय स्वरूप नै वर्तमान अस्थिरताको मूल कारण भएको उल्लेख गर्दै अहिलेको व्यवस्था अनुरूप उपयुक्त शासकीय ढाँचा र निर्वाचन प्रणाली तय हुनुपर्नेमा जोड दिए।

राजनीतिक प्रणाली र आर्थिक विकासबीचको गहिरो सम्बन्धको चर्चा गर्दै उनले देशमा प्रशस्त प्राकृतिक स्रोतसाधन हुँदाहुँदै पनि आर्थिक क्षेत्र सुदृढ नहुनु चिन्ताजनक भएको बताए। साथै, आर्थिक नीतिमाथि पनि व्यापक छलफल आवश्यक रहेको उनको भनाइ थियो।

अध्यक्ष दाहालले सरकारबाट सेवा प्रवाह प्रभावकारी रूपमा हुन नसकेको जनाउँदै त्यसकै कारण राजनीतिक दल र नेताप्रति जनताको भरोसा घट्दै गएको बताए। उनले सरकार जनताको आवश्यकता र आकांक्षामा केन्द्रित हुनुपर्नेमा जोड दिए।

कार्यक्रममा कोशी प्रदेशका मुख्यमन्त्री हिक्मतकुमार कार्कीले प्रदेश सरकारले केही दिनमै लगानी सम्मेलन आयोजना गर्न लागेको जानकारी दिए। उनले सम्मेलनबाट महत्वपूर्ण आर्थिक गतिविधि सुरू हुने आशा व्यक्त गर्दै यस वर्ष घोषणा गरिएको ‘पर्यटन वर्ष २०८२’ मार्फत पनि प्रदेशको आर्थिक गतिविधि सशक्त हुने विश्वास व्यक्त गरे।

काठमाडौं: अमेरिकी आप्रवासन कानून व्यवसायी संघ (एआईएलए) को नयाँ प्रतिवेदनले अमेरिकामा अन्तर्राष्ट्रिय विद्यार्थीहरूको भिसा रद्द गरिने घटनामा आएको वृद्धि प्रति गम्भीर चिन्ता व्यक्त गरेको छ। एआईएलएले अप्रिल १७ मा सार्वजनिक गरेको प्रतिवेदनअनुसार हालसम्म ३२७ वटा यस्ता घटनाहरू रिपोर्ट भएका छन्, जसमा विद्यार्थीहरूको भिसा रद्द गरिएको थियो वा सेभिस (विद्यार्थी तथा विनिमय आगन्तुक सूचना प्रणाली) रेकर्डहरू बन्द गरिएको थियो।

यी तथ्याङ्कहरू प्रभावित विद्यार्थी, आप्रवासन वकिल तथा विश्वविद्यालयका कर्मचारीहरूले दिएको जानकारीमा आधारित छन्। रिपोर्ट भएका ३२७ घटनामध्ये झण्डै आधा भारतीय नागरिकहरू छन् भने १४ प्रतिशत घटनामा चिनियाँ विद्यार्थीहरू प्रभावित भएका छन्। त्यसबाहेक, दक्षिण कोरिया, नेपाल र बंगलादेशका विद्यार्थीहरू समेत यसबाट प्रभावित भएका छन्।

प्रतिवेदनअनुसार, भिसा रद्द गरिएका विद्यार्थीहरूमध्ये अधिकांश वैकल्पिक व्यावहारिक प्रशिक्षण (ओपीटी) मा रहेका थिए। सेभिस रेकर्ड बन्द भएपछि ती विद्यार्थीहरू काम गर्न अयोग्य हुने अवस्था आएको छ। यद्यपि पढाइमा सक्रिय विद्यार्थीहरूलाई केही सहजता भए पनि स्नातक सकिएका विद्यार्थीहरूलाई आफ्नो कानुनी स्थिति पुनःस्थापना गर्न गाह्रो भइरहेको देखिएको छ।

रिपोर्टमा उल्लेख गरिएका केही भिसा रद्दको कारणहरू सामान्य र अचम्मलाग्दा छन्। जस्तै, पार्किङ जरिवाना वा तीव्र गतिमा सवारी सञ्चालन गरेबापतको सानो मुद्दाका कारण प्रहरीले रेकर्ड बनाउँदा पनि विद्यार्थीको भिसा रद्द गरिएको थियो। तीमध्ये अधिकांश घटनामा कुनै अभियोग लगाइएको थिएन वा मुद्दा खारेज गरिइसकिएको थियो। केवल दुई घटनामा राजनीतिक गतिविधिसँग सम्बन्ध रहेको उल्लेख गरिएको छ।

एआईएलएको भनाइमा, सेभिस रेकर्ड हटाउने र भिसा रद्द गर्ने प्रक्रियामा एकरूपता नभएको र यसमा अनियमितता देखिएको छ। यसले अन्तर्राष्ट्रिय विद्यार्थीहरूलाई बिना चेतावनी कानुनी तथा शैक्षिक संकटमा पार्ने चिन्ताजनक अवस्था सिर्जना गरेको छ।

काठमाडौं: राष्ट्रिय प्रजातन्त्र पार्टी (राप्रपा)ले पार्टी अध्यक्ष राजेन्द्र लिङ्देनसहितका नेताहरूलाई सिंहदरबार परिसरबाटै पक्राउ गर्नु सरकारको अलोकतान्त्रिक र सर्वसत्तावादी चरित्र भएको आरोप लगाएको छ।

आइतबार दिउँसो सिंहदरबारभित्र प्रदर्शन गरेपछि अध्यक्ष लिङ्देन, उपाध्यक्ष बुद्धिमान तामाङ, प्रवक्ता ज्ञानेन्द्र शाहीलगायत नेताहरूलाई प्रहरीले पक्राउ गरेको थियो। त्यसलगत्तै बसेको केन्द्रीय कार्यसम्पादन समितिको आकस्मिक बैठकले सरकारको कदमप्रति गम्भीर असन्तुष्टि जनाएको छ।

राप्रपाले जारी गरेको विज्ञप्तिमा भनिएको छ, “सरकारको यो रवैया अलोकतान्त्रिक, सर्वसत्तावादी र विपक्षी आवाज दबाउने निरंकुश चरित्रको संकेत हो। अध्यक्षसहित नेताहरूको गिरफ्तारीप्रति पार्टी घोर निन्दा र भर्त्सना गर्दछ, यसको सर्वत्र विरोध गरिनुपर्छ।”

राप्रपाले संविधानले प्रत्याभूत गरेको अभिव्यक्ति स्वतन्त्रताको प्रयोगमा अवरोध पु¥याइएको भन्दै आगामी दिनमा थप विरोध कार्यक्रमहरू सञ्चालन गर्ने चेतावनी दिएको छ।

पार्टीका प्रवक्ता मोहन कुमार श्रेष्ठद्वारा जारी विज्ञप्तिमा राजसंस्था र हिन्दू राष्ट्रको पुनःस्थापना, संघीयताको खारेजी, तथा जनजीविकासम्बन्धी विविध मुद्दाहरूका पक्षमा पार्टी अझ दृढताका साथ अघि बढ्ने उल्लेख गरिएको छ।

यसैबीच, प्रदर्शनका क्रममा पक्राउ परेका अध्यक्ष लिङ्देन, उपाध्यक्ष तामाङ, प्रवक्ता शाही, राष्ट्रिय युवा मोर्चाका अध्यक्ष कैलाश कटुवाल, उपाध्यक्ष सरोज क्षेत्री, तथा राष्ट्रिय प्रजातान्त्रिक उत्पीडित उत्थान संगठनका अध्यक्ष अमर आर्यलगायत सबै नेता रिहा भएका छन्। उनीहरूलाई प्रहरीले चार घण्टापछि हिरासत मुक्त गरेको हो।

काठमाडौं:राजसंस्था पुनर्स्थापनाको मागसहित राष्ट्रिय प्रजातन्त्र पार्टी (राप्रपा)ले आइतबार माइतीघरदेखि नयाँ बानेश्वर क्षेत्रसम्म प्रदर्शन गरेको छ। प्रदर्शन दिउँसो १२ बजेपछि माइतीघर–बबरमहल हुँदै नयाँ बानेश्वरसम्म जारी भएको हो।

प्रदर्शनका क्रममा राप्रपाका कार्यकर्ताहरूले बानेश्वर र भद्रकाली क्षेत्रस्थित निषेधित क्षेत्र तोड्ने प्रयास गरेका छन्। यसअघि, चैत २५ गते बल्खुमा राप्रपाले शान्तिपूर्ण जनप्रदर्शन आयोजना गरेको थियो। सो प्रदर्शन अपेक्षाअनुसार प्रभावकारी नहुँदा पनि पार्टीले आन्दोलनलाई निरन्तरता दिने जनाएको छ।

निषेधित क्षेत्र तोड्ने तयारीसँगै सरकारले सैह्य नहुने चेतावनी दिइसकेको छ। तर अध्यक्ष राजेन्द्र लिङ्देनले भने शान्तिपूर्ण र प्रतीकात्मक प्रदर्शन गर्न लागिएको बताउँदै बोल्न र हिँड्न समेत सीमा तोक्ने सरकारी रवैयाविरुद्ध आफूहरू उभिएको स्पष्ट पारेका छन्।

प्रदर्शनपूर्व राप्रपाका नेताहरूले शनिबार पूर्वराजा ज्ञानेन्द्र शाहसँग निर्मल निवासमा भेट गरेका थिए।

काठमाडौं: सिंहदरबारभित्र सांकेतिक प्रदर्शन गर्दा पक्राउ परेका राप्रपाका अध्यक्ष राजेन्द्र लिङ्देन, उपाध्यक्ष बुद्धिमान तामाङ र प्रवक्ता ज्ञानेन्द्र शाहीलाई जिल्ला प्रहरी परिसर, काठमाडौंमा लगिएको छ।

उनीहरूले वर्तमान व्यवस्थाविरुद्ध विभिन्न नारा अंकित पम्प्लेट देखाउँदै सिंहदरबारभित्र प्रदर्शन गरेका थिए। सुरुमा प्रहरीले उनीहरूको पम्प्लेट खोसेको थियो।

पक्राउ पर्ने क्रममा लिङ्देनले लोकतन्त्रमा बोल्न र प्रदर्शन गर्न समेत सरकारले रोक लगाएको भन्दै आपत्ति जनाए।

राप्रपाले आइतबार निषेधित क्षेत्र तोड्ने घोषणा गरेको थियो। सोही अनुसार राप्रपाका कार्यकर्ताहरू बानेश्वरस्थित निषेधित क्षेत्र नजिकै भेला हुँदै गर्दा संसदीय दलको कार्यालयमा प्रवेश गरी लिङ्देनलगायत नेताहरूले सिंहदरबारभित्र सांकेतिक प्रदर्शन गरेका थिए।

तानसेन (पाल्पा): समयमै परेको वर्षाले लामो खडेरीका कारण निराश बनेका पाल्पाका किसानको अनुहारमा खुसी छाएको छ। चैत मसान्तसम्म पानी नपरेका कारण मकै छर्न नपाएका किसान वैशाख लागेसँगै परेको वर्षाले उत्साहित भएका छन्।

तिनाउ गाउँपालिका कचलका थर्कबहादुर बगालेले भन्नुभयो, “सिँचाइको सुविधा नभएकाले मकै छर्न सकेका थिएनौँ, अब वर्षा भएपछि छर्ने तयारी गरेका छौँ।”

माथागढी गाउँपालिकाकी मीना खाम्चाले पनि राहत महसुस गरेकी छन्। “खडेरीले मकै सुक्न थालेको थियो,” उनले भनिन्, “वर्षाले बाली बचायो। सिँचाइ नभएको ठाउँमा अकासे पानी नै सबै थोक हो।”

बगनासकाली गाउँपालिका–२ का रमेश न्यौपानेले पनि पानी परेकोमा सन्तोष व्यक्त गरे। “अब मकै छर्ने काम सुरु गर्ने तयारीमा छौँ,” उनले बताए।

रिब्दीकोट गाउँपालिका सिरुखर्ककी अञ्जु थापाले पनि पानी परेपछि मकै छर्ने अवसर मिलेको बताइन्। “पानी नपरेका कारण समयमा मकै छर्न सकिएको थिएन, अब ढिलो भए पनि छर्न पाउने भयौँ,” उनले भनिन्।

पाल्पाका अधिकांश बारीमा अहिले गहुँ पाकिरहेको छ भने केही ठाउँमा गहुँ काटेर मकै छर्ने तयारी भइरहेको छ। वर्षाले मकै, अदुवा, पिँडालु, हलेदो र विभिन्न तरकारी खेतीलाई पनि टेवा पु-याएको छ।

सिँचाइ सुविधाले नपुगेका पाखा बारीमा वर्षाले चिस्यान ल्याएपछि किसानहरू ढुक्क भएका छन्। कुलो, नहर वा थोपाइ सिँचाइजस्ता विकल्प उपलब्ध नभएका ठाउँमा खडेरीका कारण तरकारीसमेत मर्न थालेका थिए।

जिल्ला कृषि विकास कार्यालयका अनुसार पाल्पामा ८,८०५ हेक्टर खेतमा वर्षायाममा सिँचाइ सुविधा उपलब्ध छ। वर्षभरि सिँचाइ गर्न सकिने क्षेत्र ३,९३४ हेक्टर छ भने मौसमी सिँचाइ चार हजार ८७१ हेक्टरमा सम्भव छ। तर सिँचाइको पहुँच नपुगेका हजारौँ किसान अकासे पानीकै भरमा खेती गर्न बाध्य छन्।