काठमाडौं: ६१ किलो सुन तस्करी प्रकरणमा फरार नेकपा माओवादी नेतृ अमला रोक्का पक्राउ परेकी छन्।

प्रहरीको केन्द्रीय अनुसन्धान ब्युरो (CIB) को टोलीले उनलाई आज शुक्रबार काठमाडौंको टोखाबाट पक्राउ गरेको हो। अमला रोक्का सुन तस्करीकै आरोपमा पक्राउ परेका बेल्जियमका नागरिक दावा छिरिङकी श्रीमती हुन्।

उनी माओवादीको रोल्पा–काठमाडौं सम्पर्क मञ्चकी पूर्व उपाध्यक्षसमेत रहेकी छन्।

कञ्चनपुर, ६ असार: सूर्य नउदाउँदै कृष्णपुर नगरपालिका–२ खल्लागोठका भीम गिरी श्रीमतीसँगै दोदा (मछेली) नदीको बगरमा पुगिसकेका हुन्छन्। हातमा फरुवा, गैँटी, कोदालो बोकेका गिरी दम्पती दिनभर बालुवा–गिट्टी चाल्ने र तारजालीमा छानेर छुट्याउने काम गर्छन्। एकातिर बालुवा, अर्कातिर गिट्टी थुपार्ने उनीहरूको दैनिकी साँझ झमक्क नपर्दासम्म चलिरहन्छ। केवल दिउँसो खाना खान दुई घण्टाको विश्राम लिने गर्दछन्।

गिरी दम्पतीको यस्तो जीवनशैली लगभग एक दशकदेखि दोहोरिएको छ। बालुवा–गिट्टी चालेर बेच्ने कामबाटै उनीहरूको जीविका चल्दै आएको हो। भीम गिरी भन्छन्, “पहिले भारत जान्थेँ, थोरै तलबमा परिवार पाल्न गाह्रो हुन्थ्यो। अहिले यही कामबाट थोरै कमाउँछु, तर परिवारसँग सँगै छु।”

चार–पाँच दिनको श्रमपछि एक ट्रली बालुवा र गिट्टी सङ्कलन गरेर उनीहरू रु २,००० देखि ३,००० सम्म कमाउँछन्। मासिक आम्दानी रु १२,००० देखि १५,००० सम्म हुन्छ। यति रकमले उनीहरू घरको नुनतेल, लत्ताकपडा र आवश्यक अन्नको जोहो गर्छन्। उनीहरूसँग थोरै जग्गा भए पनि उब्जनी पर्याप्त नभएकाले नदी नै जीवनको प्रमुख आधार बनेको हो।

भीम गिरीजस्तै, खल्लागोठका कृष्ण नाथ पनि विगत दुई दशकदेखि यही पेशामा संलग्न छन्। उनी भन्छन्, “घरका बालबालिका बाहेक सबै जना बालुवा–गिट्टी चाल्ने काममा लाग्छौं। महिनाको रु २०–२५ हजारसम्म कमाइ हुन्छ।” तर, ठेक्का ढिलो खुले बालुवा–गिट्टी चाल्न नपाइने भएकाले मजदुरी खोज्दै हिँड्नुपर्ने बाध्यता पनि उनीहरूसँग छ।

यहाँका स्थानीय बासिन्दाले असोजदेखि जेठ मसान्तसम्म बालुवा–गिट्टी चालेर बेच्ने गर्छन्। असारदेखि भदौसम्मको बर्खायाममा भने नदीजन्य पदार्थ संकलन गर्न रोक लगाइने भएकाले कामको खोजीमा अलपत्र पर्नुपर्छ।

खल्लागोठमा झन्डै ९० घरधुरी छन्, अधिकांशले बालुवा–गिट्टीको काम गरेर गुजारा चलाउँदै आएका छन्। थोरै र कम उब्जनी हुने जमिन भएकाले नदी नै उनीहरूको आयस्रोत बनेको हो। तर, यही नदी कहिलेकाहीँ विपत्ति पनि बोकाएर ल्याउने गर्छ।

स्थानीय धनबहादुर विक भन्छन्, “बर्खाको समयमा नदीमा बाढी आउँदा गाउँ नै त्रासमा बाँच्नुपर्छ। ४५ घरधुरी बाढीको उच्च जोखिममा छन्।” उनीका अनुसार नदी उत्खननको ठेक्काबाट केही हिस्सा तटबन्ध निर्माणमा लगाउनुपर्ने माग गर्दै आए पनि सुनुवाइ भएको छैन।

स्थानीयवासीको भनाइमा, “हामी नदीलाई शत्रु होइन, सहयात्री मान्छौं। यसैले हामी बाँचेका छौं।” खल्लागोठको नाम पनि पहाडबाट तराई झर्नेहरूले खल्ला (पानी जम्ने ठाउँ) मा गोठ राख्ने गरेको हुँदा खल्लागोठ रहन गएको बताइन्छ। केही स्थानीयले बालुवा चाल्नुका साथै नजिकैको वन क्षेत्रमा बाख्रापालन गरी अतिरिक्त आम्दानी पनि गर्दै आएका छन्।

काठमाडौं:जल तथा मौसम विज्ञान विभागको मौसम पूर्वानुमान महाशाखाले कोशी, मधेश, बागमती, गण्डकी प्रदेशका केही भू–भाग तथा लुम्बिनी प्रदेशको पूर्वी भागमा मनसुनी वायुको प्रभाव रहेको जनाएको छ। साथै, देशको पश्चिमी भू–भागमा पश्चिमी वायु र स्थानीय वायुको आंशिक प्रभाव रहेको र भारतको पश्चिम बङ्गाल आसपास विकसित न्यूनचापीय क्षेत्रको पनि आंशिक प्रभाव परेको महाशाखाले जानकारी दिएको छ।

महाशाखाका अनुसार आज दिउँसो देशभर आंशिकदेखि सामान्य बदली रहनेछ। देशका पहाडी भू–भागका केही स्थानहरू तथा बाँकी भू–भागका थोरै स्थानहरूमा मेघगर्जन र चट्याङसहित हल्कादेखि मध्यम वर्षा हुने सम्भावना छ। कोशी, बागमती र गण्डकी प्रदेशका एक–दुई स्थानमा भारी वर्षा पनि हुन सक्ने महाशाखाले जनाएको छ।

त्यस्तै, उच्च पहाडी तथा हिमाली भू–भागका केही स्थानहरूमा हल्का वर्षा तथा हिमपातको सम्भावना छ। कोशी र मधेश प्रदेशका तराई क्षेत्रका केही स्थानमा हावाहुरी चल्न सक्ने सम्भावना पनि रहेको छ।

आज राति पनि देशभर आंशिकदेखि सामान्य बदली रहनेछ। देशका पहाडी भू–भागका केही स्थानहरूमा तथा अन्य थोरै भू–भागमा मेघगर्जन र चट्याङसहित हल्कादेखि मध्यम वर्षा हुन सक्नेछ। कोशी, बागमती, गण्डकी र लुम्बिनी प्रदेशका एक–दुई स्थानमा भारी वर्षा हुने सम्भावना रहेको छ भने उच्च पहाडी तथा हिमाली भू–भागमा हल्का वर्षा र हिमपातको सम्भावना कायम छ।

रौतहट: पूर्वमन्त्री मोहम्मद आफताब आलमसहितलाई दिएको जन्मकैदको फैसला उल्ट्याउने उच्च अदालतका न्यायाधीशहरूमाथि छानबिन प्रक्रिया सुरु भएको छ।

राजपुर बमकाण्डमा मारिएका त्रिलोकप्रताप सिंहका ८४ वर्षीय बुबा श्रीनारायण सिंह र अधिवक्ता युवराज सफलले उच्च अदालत जनकपुरको अस्थायी इजलास वीरगन्जका न्यायाधीश खुसीप्रसाद थारु र अर्जुन महर्जनमाथि छानबिनको माग गर्दै न्याय परिषद्मा निवेदन दर्ता गराएका थिए।

न्याय परिषद्को बिहीबार बसेको बैठकले दुवै न्यायाधीशलाई इजलासमा बस्न रोक लगाउँदै सर्वोच्च अदालतमा उपस्थित हुन निर्देशन दिएको हो।

०६४ सालको पहिलो संविधानसभा निर्वाचनको अघिल्लो दिन, चैत्र २८ गते, राजपुरमा भएको बम विस्फोटमा घाइते भएकाहरुलाई इँटाभट्टामा जिउँदै जलाएर हत्या गरिएको अभियोगमा जिल्ला अदालत गौरले ०८१ साल वैशाख १४ गते आलमसहितलाई जन्मकैदको सजाय सुनाएको थियो।

तर, उच्च अदालत जनकपुरको अस्थायी इजलास वीरगन्जले उक्त फैसला उल्ट्याउँदै आलमसहित उनका भाइ मोहम्मद महताब आलम, शेख सराज र बद्री सहनीलाई सफाइ दिएको हो।

पाँच वर्ष आठ महिना आठ दिन जेल जीवन बिताएका आलम उक्त फैसलासँगै रिहा भएका थिए।

काठमाडौं। स्कटल्यान्डमा जारी टि–२० अन्तर्राष्ट्रिय त्रिकोणात्मक सिरिजअन्तर्गत आफ्नो तेस्रो खेलमा नेपालले नेदरल्यान्ड्सलाई ६ विकेटले पराजित गरेको छ।

टिटउट रंगशालामा भएको खेलमा १७५ रनको लक्ष्य पछ्याएको नेपालले १९.४ ओभरमा ४ विकेटको क्षतिमा लक्ष्य पूरा गर्‍यो।

नेपालका लागि ओपनर कुशल भुर्तेलले ५१ बलमा ६ चौकाको मद्दतमा ६५ रनको उत्कृष्ट अर्धशतक प्रहार गरे। त्यसैगरी आरिफ शेखले २३ बलमा ३ चौका र २ छक्का सहित ३९ रन बनाएर ‘रिटायर्ड हर्ट’ भए। भीम शार्कीले २७, दीपेन्द्र सिंह ऐरीले १६ तथा लोकेश बमले १२ रनको योगदान दिए।

त्यसअघि, टस हारेर पहिले ब्याटिङ गरेको नेदरल्यान्ड्सले निर्धारित २० ओभरमा ७ विकेट गुमाउँदै १७४ रन बनायो। टोलीका लागि माइकल लेभिटले ५३ बलमा ६ चौका र ५ छक्कासहित सर्वाधिक ८६ रन जोडे। रेलोफ भान डेर मर्वेले ३६ र आर्यन दत्तले १७ रन बनाए।

बलिङतर्फ नेपालका करण केसीले २ विकेट लिए। त्यस्तै ललित राजवंशी, दीपेन्द्र सिंह ऐरी, रुपेश सिंह र सन्दीप लामिछानेले एक/एक विकेट लिए।

यसअघिका खेलमा नेपाल पहिलो खेलमा नेदरल्यान्ड्ससँग तेस्रो सुपर ओभरसम्म पुगेको संघर्षपूर्ण खेलमा पराजित भएको थियो। दोस्रो खेलमा भने नेपालले स्कटल्यान्डलाई २ विकेटले पराजित गरेको थियो।

काठमाडौं: अमेरिकी विदेश विभागले अन्तर्राष्ट्रिय विद्यार्थी भिसाका लागि अपोइन्टमेन्ट तालिका चाँडै पुनः सुरु गर्ने जनाएको छ। भिसा आवेदन दिने विद्यार्थीहरूको सामाजिक सञ्जाल खाताहरू पनि विस्तारै जाँच गरिनेछ।

विदेश विभागले सबै आवेदकहरूलाई सामाजिक सञ्जाल प्रोफाइलको गोपनीयता सेटिङ ‘सार्वजनिक’ राख्न निर्देशन दिने जनाएको छ ताकि भिसा प्रक्रिया क्रममा आवश्यक छानबिन सहज रूपमा गर्न सकियोस्।

विदेश विभागले एक प्रेस विज्ञप्तिमा भन्यो, “हामी भिसा जाँचमा उपलब्ध सबै जानकारीहरू प्रयोग गरी संयुक्त राज्य अमेरिकामा प्रवेशका लागि योग्य नहुन सक्ने आवेदकहरू, विशेष गरी राष्ट्रिय सुरक्षामा खतरा पैदा गर्न सक्ने व्यक्तिहरू पहिचान गर्छौं।”

नयाँ दिशानिर्देश अन्तर्गत आवेदकहरूको अनलाइन उपस्थिति सहित व्यापक र कडा छानबिन गरिनेछ।

विदेश विभागका अनुसार विदेशस्थित अमेरिकी दूतावास र वाणिज्य दूतावासहरूले छिट्टै भिसा आवेदनहरूको अपोइन्टमेन्ट सेवा पुनः सञ्चालन गर्नेछन्।

यसअघि अमेरिकी पूर्वराष्ट्रपति डोनाल्ड ट्रम्पले विद्यार्थी भिसाका लागि विश्वभरका दूतावासहरूमा अपोइन्टमेन्ट रोक्ने आदेश जारी गरेका थिए। साथै, ट्रम्प प्रशासनले आवेदकहरूको सामाजिक सञ्जाल खाताहरूको गहिरो अनुसन्धान गर्ने योजना बनाएको थियो।