बेरुत: दक्षिण लेबनानको ज्मैज्मे नगरनजिक शुक्रबार संयुक्त राष्ट्रसंघीय (यूएन) शान्ति सेनाको नियमित गस्तीका क्रममा स्थानीयबासीसँगको झडपले तनावपूर्ण स्थिति सिर्जना भएको छ। स्थानीयहरूले शान्ति सैनिकमाथि गोली र अश्रुग्यास प्रहार गरेको आरोप लगाएका छन्।
संयुक्त राष्ट्रसंघीय अन्तरिम बल (युनिफिल) का प्रवक्ता आन्द्रेआ तेनेन्तीका अनुसार गस्तीमा खटिएको टोलीमाथि ‘ठूलो समूह’ आक्रोशित स्थानीयहरूले लाठी, बन्चरोजस्ता हतियारसहित आक्रमण गरेका थिए। उनले घटना ‘स्वीकार्य नहुने’ भन्दै यस क्रममा युएनका सवारीसाधनहरूमा क्षति पुगेको जानकारी दिए। शान्ति सैनिकहरूले आत्मरक्षा र स्थानीयको सुरक्षाका लागि ‘गैर-प्राणघातक’ उपाय अपनाएको उनले बताए।
यूएन सैनिकमा चोटपटक नपरेको जनाइएको भए पनि स्थानीयहरूले एक जना नागरिक घाइते भएको दाबी गरेका छन्। उनीहरूका अनुसार युनिफिलको गस्ती टोली लेबनानी सेनाको साथबिना नगरको छेउछाउ प्रवेश गरेपछि उनीहरूलाई बाहिर जान आग्रह गरिएको थियो, तर त्यसपछि स्थिति बिग्रिएको थियो।
प्रवक्ता तेनेन्तीले भने, “गस्ती पूर्वनियोजित र लेबनानी सेनासँग समन्वयमा गरिएको थियो।” साथै उनले युनिफिलको काममा अवरोध नगर्न र सुरक्षा सुनिश्चित गर्न सबै पक्षलाई आग्रह गरेका छन्।
इजरायल सिमानानजिकै पर्ने यो क्षेत्र नोभेम्बर महिनाको युद्धविराम सम्झौताअनुसार निगरानीमा राखिएको हो। यस्ता झडप हिजबुल्लाह समर्थक समूह र युनिफिलबीच कहिलेकाहीँ देखिए पनि सामान्यतया ती चाँडै नियन्त्रणमा ल्याइन्छन्।
सन् २०२२ को डिसेम्बरमा यस्तै एक घटनामा एक जना आइरिस शान्ति सैनिकको मृत्यु भएको थियो। हिजबुल्लाहले त्यस घटनाका अभियुक्तलाई सुरक्षासमक्ष सुम्पिए पनि करिब एक वर्षमै रिहा गरिएको थियो।
युनिफिलले हालै जानकारी दिएको अनुसार, नोभेम्बरको युद्धविराम सम्झौता अन्तर्गत लेबनानी सेनाले दक्षिण क्षेत्रको ठूलो भूभागमा पुनः तैनाथी गरेको छ। यस क्रममा युएन बलले २२५ भन्दा बढी हतियार गोदामहरू फेला पारेको दाबी गरेको छ। तर इजरायली सेना अझै पनि तोकिएको समयावधि सकिए पनि पाँच स्थानमा उपस्थित रहेकाले लेबनानी सेनाको पूर्ण तैनाथी अवरुद्ध भइरहेको जनाइएको छ।
