काठमाडौँ । उत्तर कोरियाका सर्वोच्च नेता किम जोङ उन लामो समयदेखि सार्वजनिक रूपमा नदेखिएपछि उनको अवस्थाबारे विभिन्न अड्कलबाजी सुरु भएका छन् । करिब दुई महिनादेखि उनी सरकारी तथा सार्वजनिक कार्यक्रमहरूमा सहभागी नभएको र उनको कुनै नयाँ तस्बिर वा भिडियो सार्वजनिक नभएको बताइएको छ ।
सामान्यतया उत्तर कोरियाका महत्वपूर्ण सरकारी कार्यक्रम, नयाँ आयोजना उद्घाटन, सैन्य गतिविधि तथा ठूला परियोजनाको निरीक्षणमा किम जोङ उनको उपस्थिति हुने गर्छ । तर पछिल्लो समय भएका महत्वपूर्ण कार्यक्रममा उनी अनुपस्थित भएपछि उनको अवस्थाबारे चासो बढेको हो ।
रिपोर्टअनुसार किम जोङ उनको पछिल्लो सार्वजनिक तस्बिर जुन ९ मा खिचिएको बताइएको छ । उक्त तस्बिरमा उनी चीनबाट आएका अधिकारीहरूसँग उत्तर कोरियामा भेटवार्ता गरिरहेको देखिएका थिए । त्यसयता उनका सार्वजनिक गतिविधिबारे नयाँ विवरण वा तस्बिरहरू बाहिर आएका छैनन् ।
महत्वपूर्ण कार्यक्रममा पनि अनुपस्थित
यसै साता उत्तर कोरियामा विभिन्न महत्वपूर्ण कार्यक्रम सम्पन्न भए । प्योङयाङस्थित ‘किम जोङ थाए इलेक्ट्रिक लोकोमोटिभ कम्प्लेक्स’ को निरीक्षणका क्रममा प्रधानमन्त्री पाक थाए-सोङ उपस्थित थिए । त्यस्तै, नाम्पोमा बालबालिकाका लागि निर्माण गरिएको ‘स्कुलचिल्ड्रन प्यालेस’ उद्घाटन कार्यक्रममा पनि किमको उपस्थिति रहेन ।
अमेरिका, जापान र दक्षिण कोरियासँग सम्बन्धित सैन्य अभ्यासबारे उत्तर कोरियाले आधिकारिक प्रतिक्रिया दिए पनि त्यसमा किम स्वयं सार्वजनिक रूपमा देखा परेनन् ।
उत्तर कोरियाली सरकारी सञ्चारमाध्यमहरूले सामान्यतया किमका गतिविधिलाई प्रमुखताका साथ प्रकाशन तथा प्रसारण गर्ने गर्छन् । तर पछिल्लो समय उनका नयाँ टेलिभिजन फुटेज, तस्बिर वा प्योङयाङमा भएका आन्तरिक बैठकसम्बन्धी दृश्यसमेत सार्वजनिक नभएको बताइएको छ ।
अनुपस्थितिको कारणबारे विभिन्न अनुमान
किम जोङ उनको लामो अनुपस्थितिको कारणबारे विभिन्न अनुमान भइरहेका छन् । उत्तर कोरियामा पछिल्लो समय अत्यधिक गर्मी र उच्च आर्द्रता रहेकाले स्वास्थ्य तथा आरामका कारण उनी सार्वजनिक कार्यक्रमबाट टाढा रहेको हुन सक्ने अनुमान पनि गरिएको छ ।
तर, गर्मी मात्र उनको लामो अनुपस्थितिको कारण हुन सक्नेमा प्रश्न उठाइएको छ । यसअघि पनि गर्मी मौसममा उनी नियमित रूपमा सार्वजनिक कार्यक्रममा सहभागी हुँदै आएका थिए ।
केही अड्कलबाजीमा किमको स्वास्थ्य अवस्थालाई लिएर समेत प्रश्न उठाइएको छ । अझ कतिपयले उनको मृत्यु भइसकेको वा सार्वजनिक कार्यक्रममा उनको स्थानमा ‘बडी डबल’ प्रयोग भइरहेको दाबीसमेत गरेका छन् ।
तर यी दाबीहरूको कुनै आधिकारिक पुष्टि भएको छैन र विश्वसनीय प्रमाण पनि सार्वजनिक भएको छैन ।
सरकारी मौनताले बढायो चासो
उत्तर कोरियामा सर्वोच्च नेताको सार्वजनिक उपस्थितिलाई सरकारी प्रचारको महत्वपूर्ण हिस्सा मानिन्छ । नयाँ भवन, कारखाना तथा ठूला आयोजनाको उद्घाटनदेखि सैन्य गतिविधिसम्म किमका तस्बिर र भिडियोहरू सरकारी सञ्चारमाध्यममा प्रमुखताका साथ देखाइन्छन् ।
त्यसैले लामो समयसम्म उनको नयाँ तस्बिर वा भिडियो सार्वजनिक नहुनुलाई असामान्य मानिएको हो ।
किम व्यक्तिगत रूपमा आराम गरिरहेका छन्, स्वास्थ्यसम्बन्धी कारणले सार्वजनिक गतिविधिबाट टाढा छन् वा उनको अनुपस्थितिको पछाडि अन्य कुनै राजनीतिक वा प्रशासनिक कारण छ भन्ने कुरा भने अहिलेसम्म स्पष्ट भएको छैन ।
उत्तर कोरियाली सरकार वा सरकारी सञ्चारमाध्यमबाट उनको अवस्थाबारे स्पष्ट जानकारी नआएसम्म किम जोङ उनको अनुपस्थितिसम्बन्धी बाहिर आएका दाबीलाई अनुमान र अड्कलबाजीका रूपमा मात्र लिनुपर्नेछ ।
