नयाँ दिल्ली । सामाजिक अभियन्ता सोनम वाङचुकले नीट–यूजी (NEET-UG) प्रश्नपत्र लीक प्रकरणलाई लिएर सुरु गरेको २६ दिन लामो अनशन अन्त्य गरेका छन्। विद्यार्थीहरूको आन्दोलनप्रति ऐक्यबद्धता जनाउँदै उनी अनशनमा बसेका थिए।
भारतीय जनता पार्टीका अध्यक्ष तथा केन्द्रीय मन्त्री जे.पी. नड्डा, केन्द्रीय मन्त्री डा. जितेन्द्र सिंह तथा लेह–लद्दाखको एपेक्स बडीका वरिष्ठ नेताहरूको उपस्थितिमा वाङचुकले अनशन तोडेका हुन्।
सामाजिक सञ्जाल ‘एक्स’ (पूर्व ट्विटर) मा प्रतिक्रिया दिँदै वाङचुकले विभिन्न राजनीतिक दलका ६५ सांसदहरूले पत्रमार्फत अनशन अन्त्य गर्न आग्रह गरेको उल्लेख गरेका छन्। उनले विभिन्न पक्षसँग भएको लामो छलफल र देशमा सम्भावित तनाव तथा हिंसाको अवस्थालाई ध्यानमा राख्दै अनशन अन्त्य गर्ने निर्णय गरेको बताएका छन्।
उनले अनशन अन्त्यसँग सम्बन्धित सहमति र सर्तबारे चाँडै नै छुट्टै भिडियोमार्फत विस्तृत जानकारी दिने बताएका छन्। साथै, आफ्ना समर्थक र सर्वसाधारणलाई कुनै पनि प्रकारको हिंसात्मक गतिविधिमा संलग्न नहुन र शान्तिपूर्ण रूपमा आन्दोलनलाई अघि बढाउन आग्रह गरेका छन्।
नीट–यूजी परीक्षाको प्रश्नपत्र लीक भएको विरोधमा विद्यार्थीहरू विगत एक महिनादेखि नयाँ दिल्लीको जन्तर–मन्तरमा प्रदर्शनरत छन्। प्रदर्शनकारीहरूले केन्द्रीय शिक्षामन्त्री धर्मेन्द्र प्रधानको राजीनामा माग गर्दै आन्दोलन जारी राखेका छन्। यही आन्दोलनप्रति समर्थन जनाउँदै सोनम वाङचुक २६ दिनदेखि आमरण अनशनमा बसेका थिए।
