काठमाडौं: स्वीडेनको एक मस्जिद अगाडि कुरान जलाउने विवादास्पद प्रदर्शनकारी सलवान मोमिका बुधबार साँझ अज्ञात व्यक्तिले गोली हानी हत्या गरेका छन्। बीबीसीका अनुसार, ३८ वर्षीय सलवानलाई स्टकहोमको सडेरटेलजेको एउटा अपार्टमेन्टमा गोली हानिएको थियो। हत्याका समयमा सलवान टिकटकमा लाइभ थिए।
सलवान मोमिका २०२३ मा स्वीडेनको विभिन्न स्थानमा धेरै पटक कुरान जलाएर र इस्लामको प्यागम्बरको आलोचना गर्दै चर्चामा आएका थिए। यस घटनाले विश्वभर विवाद सिर्जना गरेको थियो, र स्वीडेनविरुद्ध व्यापक प्रदर्शन पनि भएको थियो। उनलाई आरोप लगाइएको थियो कि उनले कुरानको पानामा सुँगुरको मासु राखेर कुरानलाई खुट्टाले कुचेको थियो।
सलवानका हत्यारा अझै पत्ता लागेका छैनन्। स्वीडेन प्रहरीले अज्ञात व्यक्तिविरुद्ध मुद्दा दर्ता गरी हत्याराको खोजी सुरु गरेको छ। प्रहरी अधिकारीहरूले घटनामा संलग्नको पहिचान गर्न काम गरिरहेका छन्।
सलवान मोमिकाको कुरान जलाउने र इस्लाम विरोधी गतिविधिहरूले स्वीडेनमा गम्भीर प्रतिक्रिया उत्पन्न गरेको थियो। उनलाई इस्लामविरुद्ध घृणा फैलाएको आरोप लगाइएको थियो। यसका कारण स्वीडेनको अदालतमा १६ जनवरीमा उनको विरुद्ध मुद्दा सुरु भएको थियो, र यस मुद्दाको निर्णय ३१ जनवरीमा आउने बताइएको थियो।
आज, ३१ जनवरीमा स्टकहोम जिल्ला अदालतमा सलवानको मृत्युको पुष्टि भएको छ, र अदालतले सुनुवाई स्थगित गरेको छ। न्यायाधीश गोरान लुन्डहले मृतकको पुष्टि गरे र अदालतले आगामी प्रक्रिया स्थगित गरेको जानकारी दिएका छन्।
सलवान मोमिका इराकको असिरियन-अरामी (क्रिश्चियन) समुदायका सदस्य थिए। यस समुदायले इराकमा सधैं राजनीतिक रूपमा सक्रिय रहँदै आइरहेको छ र प्रायः आफ्ना माग पूरा गर्न हिंसाको सहारा लिन्छ। सलवान मोमिका इराकी मिलिसियामा पनि कार्यरत थिए।
सलवानले आफ्नो विरोध मुस्लिम समुदायविरुद्ध नभइ इस्लाम धर्मको विरुद्धमा रहेको बताउँदै आएका थिए। उनले कुरानको सन्देशबाट स्वीडेनका जनतालाई जोगाउन चाहेको दाबी गरेका थिए।
स्वीडेनी प्रहरीले अभिव्यक्ति स्वतन्त्रता अनुसार उनको प्रदर्शनलाई अनुमति दिएको थियो, तर यसै बीच उनी विरुद्ध पनि मुद्दा दायर गरिएको थियो।
