नयाँदिल्ली: प्रवर्तन निदेशालय (ईडी)ले कांग्रेससँग सम्बन्धित नेशनल हेराल्ड प्रकरणमा मनी लान्ड्रिङसम्बन्धी मुद्दामा पहिलो आरोपपत्र दायर गरेको छ। मंगलबार दायर गरिएको आरोपपत्रमा सोनिया गान्धी, राहुल गान्धी, साम पित्रोदा र सुमन दुबेको नाम समावेश गरिएको छ।
यो मुद्दाको सुनुवाइ आगामी अप्रिल २५ मा दिल्लीको राउज एभिन्यु अदालतमा हुने छ। अदालतले ईडीसँग मुद्दासम्बन्धी केस डायरी पनि माग गरेको छ।
उक्त प्रकरण सन् २०१२ मा बीजेपी नेता सुब्रमण्यम स्वामीले सोनिया गान्धी, राहुल गान्धी तथा उनीहरूसँग सम्बन्धित कम्पनी र व्यक्तिहरूविरुद्ध उजुरी दिएपछि सार्वजनिक भएको थियो।
ईडीले हालै मनी लान्ड्रिङ अनुसन्धानको क्रममा २०२५ अप्रिल १२ मा दिल्ली, लखनउ र मुम्बईस्थित ६६१ करोड रुपैयाँ बराबरको अचल सम्पत्ति जफत गर्ने प्रक्रिया अघि बढाएको हो।
यसैबीच, मंगलबार नै सांसद प्रियंका गान्धीका पति रोबर्ट वाड्रा ईडीको कार्यालयमा उपस्थित भएका थिए। उनलाई गुरुग्रामको शिकोहपुरमा भएको भनिएको जग्गा घोटालासम्बन्धी सोधपुछ गरिएको थियो।
यस विषयमा कांग्रेस नेताहरूले तीव्र प्रतिक्रिया जनाएका छन्। नेता जयराम रमेशले सामाजिक सञ्जाल एक्समा लेखेका छन्, “यो प्रधानमन्त्री र गृहमन्त्रीद्वारा चलाइएको बदला लिनेस्वरूपको राजनीति हो।”
उनले थप लेखेका छन्, “नेशनल हेराल्डको सम्पत्ति जफत गर्नु राज्य प्रायोजित अपराध हो, जसलाई कानुनी आवरणमा प्रस्तुत गरिएको छ। सोनिया गान्धी, राहुल गान्धी र अन्य विरुद्ध आरोपपत्र दायर गर्नु प्रतिशोध र धम्कीको राजनीतिबाहेक अरू केही होइन। तर कांग्रेस चुप लाग्ने छैन। सत्यको जीत हुनेछ – सत्यमेव जयते।”
