काठमाडौँ: निजामती कर्मचारी अस्पताल (सिभिल अस्पताल) ले परम्परागत चिनियाँ चिकित्सा सेवा सुरु गरेको छ। सङ्घीय मामिला तथा सामान्य प्रशासनमन्त्री राजकुमार गुप्ता र नेपालका लागि चिनियाँ राजदूत चेन सोङ्गले संयुक्त रूपमा ‘परम्परागत चिनियाँ अन्तर्राष्ट्रिय निदान तथा उपचार केन्द्र’ को उद्घाटन गर्नुभयो।
मन्त्री गुप्ताले परम्परागत चिनियाँ चिकित्सा पद्धतिले आधुनिक उपचार प्रणालीलाई समृद्ध बनाउँदै लगेको बताउनुभयो। उहाँले भन्नुभयो, “मानव शरीर, प्रकृति र ऊर्जाको सन्तुलनमा आधारित यो विधिमा एक्युपञ्चर, हर्बल मेडिसिन, मसाज (तुइना) र खानपानसम्बन्धी परामर्शजस्ता विधिहरू समेटिएका छन्। यस पद्धतिको सुरुवातले नेपालमा उपचार प्रणालीलाई अझ उन्नत बनाउने विश्वास लिएको छु।”
उहाँले स्वास्थ्य सेवामा विश्वभर नवीन प्रविधि र परम्परागत ज्ञानको संयोजन भइरहेको र यसले स्वास्थ्य सेवालाई थप प्रभावकारी बनाएको धारणा व्यक्त गर्नुभयो। साथै, अस्पतालको स्थापना र त्यसपछि निरन्तर सहयोग गर्दै आएकोमा चीन सरकारप्रति कृतज्ञता प्रकट गर्दै उहाँले भविष्यमा पनि अस्पताललाई विस्तारित र प्रभावकारी बनाउन चिनियाँ सहयोग आवश्यक रहेको बताउनुभयो। “नेपाल–चीनको ऐतिहासिक मित्रतालाई अझ बलियो बनाउन यस युनिटले महत्वपूर्ण योगदान दिने विश्वास छ,” मन्त्री गुप्ताले भन्नुभयो।
नेपालका लागि चीनका राजदूत चेन सोङ्गले सिभिल अस्पताललाई विश्वस्तरीय सेवा प्रदान गर्ने नेपालकै नमूना अस्पताल बनाउन आवश्यक सहयोग गर्ने प्रतिबद्धता व्यक्त गर्नुभयो।
अस्पतालका कार्यकारी निर्देशक डा. विधाननिधि पौडेलले अस्पतालले अबदेखि परम्परागत चिनियाँ चिकित्सा पद्धति सेवा प्रदान गर्ने जानकारी दिनुभयो। उहाँका अनुसार चीन सरकारले जनशक्ति, औषधि र प्रविधि उपलब्ध गराएर हाल दुई जना चिकित्सकद्वारा सेवा सुरु गरिएको छ।
